Lýðstjórnarlýðveldið Kongó

Lýðstjórnarlýðveldið Kongó (Franska: République Démocratique du Congo) eða einfaldlega Kongó eða Austur-Kongó til aðgreiningar frá Vestur-Kongó, er land í Mið-Afríku og þriðja stærsta land álfunnar. Það hefur áður heitið Belgíska Kongó, Kongó-Kinsasa og Saír (til 1997). Það á landamæri að Vestur-Kongó í vestri, Mið-Afríkulýðveldinu og Suður-Súdan í norðri, Úganda, Rúanda, Búrúndí og Tansaníu í austri, og Sambíu og Angóla í suðri. Aðgangur að sjó er um 40 km breiða ræmu við Gíneuflóa.

République Démocratique du Congo
Fáni	Skjaldarmerki
Kjörorð: Démocratie - Justice - Unité (íslenska: Lýðræði - Réttlæti - Sameining)
Þjóðsöngur: Debout Congolais
Höfuðborg	Kinsasa
Opinbert tungumál	franska
Stjórnarfar	Lýðveldi
Forseti	Félix Tshisekedi
Forsætisráðherra	Jean-Michel Sama Lukonde
Sjálfstæði	frá Belgíu
- Dagur	30. júní, 1960
Flatarmál  - Samtals  - Vatn (%)	11. sæti 2.345.409 km² 3,3%
Mannfjöldi  - Samtals (2016)  - Þéttleiki byggðar	19. sæti 78.736.153 29,3/km²
VLF (KMJ)	áætl. 2014
- Samtals	55 millj. dala (92. sæti)
- Á mann	694 dalir (185. sæti)
Gjaldmiðill	kongóskur franki
Tímabelti	UTC+1 - UTC+2
Þjóðarlén	.cd
Landsnúmer	243

Elstu mannvistarleifar í Kongó eru um 80.000 ára gamlar. Þar risu ríki eins og Lundaríkið, Lubaveldið og Konungsríkið Kongó við ósa Kongófljóts. Fyrsti Vesturlandabúinn sem kannaði vatnasvið Kongófljóts var Henry Morton Stanley sem síðar aðstoðaði Leópold 2. konung Belgíu við að gera landið að einkanýlendu sinni sem hann kallaði Fríríkið Kongó. Leópold kom á gúmmíplantekrum og stýrði nýlendunni af mikilli grimmd sem hneykslaði alþjóðasamfélagið. Að lokum féllst Belgíustjórn á að taka stjórn nýlendunnar yfir vegna þrýstings frá öðrum Evrópuríkjum. Kongó fékk sjálfstæði árið 1960 og fyrsti forsætisráðherra landsins var Patrice Lumumba. Árið 1965 leiddi Joseph Mobutu herforingjabyltingu gegn honum. Árið 1971 breytti hann nafni landsins í Saír. Mobutu var einræðisherra og nýtti aðstöðu sína til að hagnast persónulega á auðlindum landsins. Í kjölfar borgarastyrjaldarinnar í Rúanda braust borgarastyrjöld út í austurhluta landsins sem lyktaði með því að Mobutu flúði land og nafni landsins var aftur breytt. Önnur styrjöldin í Kongó hófst árið 1998 og stóð til 2003. Eftir að stríðinu lauk hafa reglulega blossað upp staðbundin átök í landinu. Kynferðisofbeldi er útbreitt, og sjúkdómar og hungursneyðir herja á íbúana. ^{[heimild vantar]}

Íbúar Kongó eru yfir 78 milljónir talsins. Landið er nítjánda fjölmennasta land heims og það fjórða fjölmennasta í Afríku. Í landinu búa um 200 þjóðarbrot sem flest tala bantúmál. Frumbyggjar landsins eru pygmíar sem eru aðeins um 600.000. Um 95% íbúa landsins eru kristnir, þar af um helmingur rómversk-kaþólskir. Landið á miklar náttúruauðlindir og er stærsti kóbaltframleiðandi heims en langvinnur ófriður hefur orðið til þess að íbúar landsins eru með einar lægstu meðaltekjur í heimi.

Héruð

	1. Kinshasa	14. Ituri Province
	2. Kongo Central	15. Haut-Uele
	3. Kwango	16. Tshopo
	4. Kwilu Province	17. Bas-Uele
	5. Mai-Ndombe Province	18. Nord-Ubangi
	6. Kasaï Province	19. Mongala
	7. Kasaï-Central	20. Sud-Ubangi
	8. Kasaï-Oriental	21. Équateur
	9. Lomami Province	22. Tshuapa
	10. Sankuru	23. Tanganyika Province
	11. Maniema	24. Haut-Lomami
	12. South Kivu	25. Lualaba Province
	13. North Kivu	26. Haut-Katanga Province