Flosi Ólafsson

Flosi Ólafsson (27. október 1929 – 24. október 2009) var íslenskur leikari, leikstjóri, hagyrðingur og rithöfundur. Flosi leikstýrði áramótaskaupinu þrisvar sinnum; árin 1968, 1969 og 1970. Hann útskrifaðist sem stúdent frá Menntaskólanum á Akureyri árið 1953, nam leiklist við Leiklistarskóla Þjóðleikhússins á árunum 1956 til 1958 og leikstjórn og þáttagerð hjá Breska ríkisútvarpinu (BBC) frá 1960 til 1961. Flosi leikstýrði fjölda leikrita og þátta fyrir útvarp og sjónvarp og lék sjálfur og söng í fjölmörgum uppfærslum Þjóðleikhússins og í fjölda kvikmynda. Flosi var líka mikill hestamaður.

Flosi lék í einni þekktustu sjónvarpsauglýsingu sem gerð hefur verið á Íslandi en það var auglýsing frá leigubílastöðinni Hreyfli árið 1995. Í auglýsigunni rappaði Flosi símanúmer stöðvarinnar og hefur auglýsingin verið flokkuð sem ein best heppnaðasta sjónvarpsauglýsing á Íslandi.

Fjölskylda

Flosi var sonur Ólafs Jónssonar (1905-1989) verslunarmans og Önnu Oddsdóttur, síðar Stephensen (1908-1980) kaupkonu. Kjörforeldrar Ólafs Jónssonar föður Flosa voru Flosi Sigurðsson (1874-1952) trésmiður og Jónína Jónatansdóttir (1869-1946) húsmóðir. Flosi var giftur Lilju Margeirsdóttur og þau eignuðust eitt barn. Fyrir átti Flosi eina dóttur

Hagyrðingurinn Flosi

Flosi var frægur hagyrðingur, og frægastur er hann fyrir stutta vísu sem hann setti saman á hagyrðingakvöldi. Það kom til vegna þess að þá var verið að tala um Vin Hafnarfjarðar en í sömu mund var þess minnst að Hafnfirðingar hafa löngum sungið bæjarfélagi sínu lof í laginu: Þú, hýri Hafnarfjörður. Þá varð til þessi vísa Flosa:

Er mæti ég hýrum Hafnfirðing

í Hellisgerði.

Aftan og framan og allt um kring

er ég á verði.

Hann bætti svo seinna um betur:

Ef ætlarðu að fara á ástarþing

er upplagt að hafa það svona.

Krækja í hýran Hafnfirðing,

sem helst þarf að vera kona.

Tilvitnanir

• Er ekki aðalkosturinn við íslenska hestinn sá að hann er ekki þýskur? (úr 1. tbl Eiðfaxa 1974). Þannig skrifaði Flosi þegar umræðan snerist öll um það að íslenski hesturinn ætti að sýna þýska kosti.

Ferill

Kvikmynda- og sjónvarpsþáttaferill

Ár	Kvikmynd/Þáttur	Hlutverk	Athugasemdir og verðlaun
1962	79 af stöðinni
1967	Áramótaskaup 1967
1968	Áramótaskaup 1968	Leikstjóri
1969	Áramótaskaup 1969	Leikstjóri
1970	Áramótaskaup 1970	Leikstjóri
1978	Áramótaskaup 1978
1979	Running Blind	Paul
1982	Með allt á hreinu	Sigurjón Digri
1984	Hrafninn flýgur	Erik
1985	Hvítir mávar	Bjarki Tryggvason
	Löggulíf	Þorvarður „Varði“ varðstjóri
1988	Í skugga hrafnsins	Eiríkur
1992	Veggfóður: Erótísk ástarsaga	Geirvar Páll
1994	Skýjahöllin	Verkstjóri
1995	Á köldum klaka	Eigandi hótels

Bókmenntaferill

Ár	Bók	Athugasemdir og verðlaun
1973	Slett úr klaufunum
1974	Hneggjað á bókfell
1975	Leikið lausum hala
1975	Bjargvætturinn í Grasinu	Þýðandi
1982	Í kvosinni
2003	Ósköpin öll
2004	Heilagur sannleikur

Tenglar

• Flosi Ólafsson á Internet Movie Database
• Flosi Ólafsson á Glatkistunni
• Flosi Ólafsson; grein í DV 2000
• Með ólíkindum þægur krakki; grein í Morgunblaðinu 1989