Petr Pavel
Petr Pavel (f. 1. nóvember 1961) er tékkneskur stjórnmálamaður, fyrrum hershöfðingi í tékkneska hernum og núverandi forseti Tékklands. Hann var áður formaður hermálanefndar Atlantshafsbandalagsins frá 2015 til 2018 og yfirmaður herafla Tékklands frá 2012 til 2015.
| Petr Pavel | |
|---|---|
 Petr Pavel árið 2023. | |
| Forseti Tékklands | |
Núverandi | |
| Tók við embætti 9. mars 2023 | |
| Forsætisráðherra | Petr Fiala |
| Forveri | Miloš Zeman |
| Formaður hermálanefndar Atlantshafsbandalagsins | |
| Í embætti 26. júní 2015 – 29. júní 2018 | |
| Forveri | Knud Bartels |
| Eftirmaður | Stuart Peach |
| Persónulegar upplýsingar | |
| Fæddur | 1. nóvember 1961 Planá, Tékkóslóvakíu (nú Tékklandi) |
| Stjórnmálaflokkur | Óflokksbundinn (1989–) Kommúnistaflokkur Tékkóslóvakíu (1985–1989) |
| Maki | Hana Pavlová (g. 1986–2001) Eva Pavlová (g. 2004) |
| Börn | 3 |
| Undirskrift |  |
Pavel var kjörinn forseti Tékklands í seinni umferð forsetakosninga þar í landi þann 28. janúar 2023. Hann tók við af Miloš Zeman sem forseti þann 9. mars.
Æviágrip
breytaPetr Pavel hóf feril sinn í tékkneska hernum árið 1983.[1] Pavel var meðlimur í Kommúnistaflokki Tékkóslóvakíu á yngri árum og hefur hlotið gagnrýni fyrir það í seinni tíð. Hann hefur lýst aðild sinni að flokknum sem mistökum en segir þó að flokksaðild hafi verið eðlileg hjá fjölskyldu hans á þessum tíma. Á námsárum sínum í herskóla lagði Pavel stund á nám sem tengdist leyniþjónustustörfum. Hann sagði upp aðild sinni að kommúnistaflokknum þegar kommúnistastjórn Tékkóslóvakíu leið undir lok árið 1989 en hélt áfram þjálfun sinni til leyniþjónustustarfa.[2]
Pavel hlaut jafnframt þjálfun sem sérsveitarliði í fallhlífadeild hersins. Í Júgóslavíustríðunum árið 1993 tók Pavel þátt í því að bjarga frönskum hermönnum sem voru í sjálfheldu milli Serba og Króata í Króatíu.[3] Hann hlaut fyrir þetta viðurkenningar og frægð í Frakklandi.[2]
Síðar nam Pavel herfræði í Bretlandi og útskrifaðist með meistaragráðu frá King's College London. Pavel hóf störf hjá Atlantshafsbandalaginu eftir að Tékkland gerðist aðili að því árið 1999. Hann varð formaður hermálanefndar bandalagsins árið 2015.[2] Var þetta í fyrsta sinn sem einstaklingur frá fyrrum austantjaldsríki gegndi þessu embætti.[1]
Pavel kom meðal annars til Íslands á vegum Atlantshafsbandalagsins árið 2016.[4] Pavel sagði við það tilefni að hann teldi framtíð Atlantshafsbandalagsins byggjast á breiðri samvinnu, meðal annars við tví- og marghliða öryggisstofnanir. Hann tók jafnframt fram að Rússar hefðu breytt stefnu sinni á undanförnum árum og virtust vilja stefna að því að endurheimta stöðu sína sem heimsveldi, meðal annars með hernaðaríhlutun sinni í Transnistríu, stríðinu í Georgíu og innlimun sinni á Krímskaga. Hann taldi þó ekki tilefni til varanlegrar veru NATO á Íslandi.[1]
Pavel gaf kost á sér sem óháður frambjóðandi í forsetakosningum Tékklands árið 2023. Í kosningabaráttunni talaði Pavel fyrir auknum stöðugleika í landinu og sagðist hafa orðið var við að kjósendum þætti ríkisvaldið ekki sinna skyldum sínum nægilega vel.[3] Pavel lenti í fyrsta sæti í fyrri umferð kosninganna og atti kappi við fyrrum forsætisráðherrann og viðskiptajöfurinn Andrej Babiš í seinni umferðinni. Kosningabaráttan varð óvægin og meðal annars varð Pavel að bera á bak falska orðróma um að hann væri dauður á samfélagsmiðlinum X. Pavel hefur stutt Úkraínumenn í yfirstandandi innrás Rússa í Úkraínu og því sakaði Babiš hann jafnframt um að vilja leiða Tékkland í stríð gegn Rússlandi.[2]
Pavel vann afburðasigur í seinni umferð kosninganna þann 28. janúar 2023 með 57 prósentum atkvæða gegn 43 prósentum sem Andrej Babiš hlaut.[5]
Eftir að Pavel vann kosningarnar ræddi hann símleiðis við Tsai Ing-wen, forseta Lýðveldisins Kína á Taívan, sem óskaði honum til hamingju með kjörið. Leiðtogar Alþýðulýðveldisins Kína á meginlandinu brugðust illa við símtalinu og sökuðu Pavel um að hafa skipt sér að innanríkismálum Kína með því að eiga í samskiptum við leiðtoga Taívans, sem Kínverjar líta á sem hluta af Kína.[6]
Tilvísanir
breyta- ↑ 1,0 1,1 1,2 Kristján H. Johannessen (22. nóvember 2016). „Breið samvinna er NATO framtíðar“. Morgunblaðið. bls. 11.
- ↑ 2,0 2,1 2,2 2,3 „Fyrrverandi NATO hershöfðingi kjörinn forseti Tékklands“. Varðberg. 28. janúar 2023. Sótt 29. janúar 2023.
- ↑ 3,0 3,1 „Nýr forseti var einn af æðstu mönnum NATO“. mbl.is. 28. janúar 2023. Sótt 29. janúar 2023.
- ↑ „Formaður hermálanefndar NATO á Íslandi“. Stjórnarráð Íslands. 21. nóvember 2016. Sótt 29. janúar 2023.
- ↑ Viktor Örn Ásgeirsson (28. janúar 2023). „Yfirburðasigur hershöfðingjans í Tékklandi“. Vísir. Sótt 29. janúar 2023.
- ↑ „Kínverjar skamma Pavel“. mbl.is. 31. janúar 2023. Sótt 31. janúar 2023.
| Fyrirrennari: Miloš Zeman |
|
Eftirmaður: Enn í embætti | |||