Norðurland vestra
| ár | mannfjöldi | hlutfall af heildarfjölda |
| 1920 | 8.636 | 9,14% |
| 1930 | 8.000 | 7,36% |
| 1940 | 7.665 | 6,30% |
| 1950 | 7.340 | 5,09% |
| 1960 | 7.561 | 4,22% |
| 1970 | 7.748 | 3,79% |
| 1980 | 8.628 | 3,73% |
| 1990 | 8.631 | 3,35% |
| 2000 | 7.873 | 2,76% |
| 2010 | 7.394 | 2,33% |
Norðurland vestra er hérað sem nær yfir vesturhluta Norðurlands. Það var upphaflega skilgreint sem eitt af átta kjördæmum Íslands árið 1959 og náði yfir Vestur-Húnavatnssýslu, Austur-Húnavatnssýslu og Skagafjarðarsýslu ásamt með kaupstöðunum Sauðárkróki og Siglufirði. Sjá grein um Norðurlandskjördæmi vestra varðandi úrslit alþingiskosninga í kjördæminu. Með breyttri kjördæmaskipan sem fyrst var kosið eftir 2003 var Norðurlandskjördæmi vestra sameinað Vesturlandskjördæmi og Vestfjarðakjördæmi til að mynda Norðvesturkjördæmi.
1992 var Héraðsdómur Norðurlands vestra stofnaður með aðsetur á Sauðárkróki.
Norðurland vestra er eitt af átta héruðum sem Hagstofa Íslands notar við framsetningu á ýmsum talnagögnum, t.d. um íbúafjölda. Árið 2007 minnkaði héraðið þegar Siglufjörður sameinaðist Ólafsfirði. Sameinað sveitarfélag þeirra, Fjallabyggð, telst nú til Norðurlands eystra.
1. desember 2007 bjuggu 7.359 á Norðurlandi vestra, þar af 2.555 á Sauðárkróki. Aðrir stærri bæir eru Blönduós, Hvammstangi og Skagaströnd.