Cristiano Ronaldo

Cristiano Ronaldo (fullt nafn Cristiano Ronaldo dos Santos Aveiro, fæddur 5. febrúar 1985) er portúgalskur knattspyrnumaður sem spilar sem framherji hjá ítalska liðinu Juventus.

Cristiano Ronaldo
Upplýsingar
Fullt nafn	Cristiano Ronaldo dos Santos Aveiro
Fæðingardagur	5. febrúar 1985 (1985-02-05)
Fæðingarstaður	Funchal, Madeira, Portúgal
Hæð	1,86 m
Leikstaða	framherji/kantmaður
Núverandi lið
Núverandi lið	Juventus
Númer	7
Yngriflokkaferill
1993–1995 1995–1997 1997–2001	CF Andorinha CD Nacional Sporting CP
Meistaraflokksferill1
Ár	Lið	Leikir (mörk)
2001–2003 2003–2009 2009–2018 2018-	Sporting CP Manchester United Real Madrid Juventus	25 (5) 196 (84) 292 (311) 94 (79)
Landsliðsferill2
2002–2003 2003–	Portúgal U-21 Portúgal	2 (1) 179 (109)
1 Leikir með meistaraflokkum og mörk talið í aðaldeild liðsins og síðast uppfært maí 2021. 2 Landsliðsleikir og mörk uppfærð júlí 2021.

Ronaldo og Lionel Messi. Portúgal á móti Argentínu.

Ronaldo hóf feril sinn hjá Sporting Lissabon en var síðan keyptur til Manchester United þar sem hann gerði garðinn frægan. Hann lék síðar með spænska liðinu Real Madrid og hinu ítalska Juventus. Hann var kjörinn knattspyrnumaður ársins af FIFA árið 2008, 2013, 2014 og 2016. Ennfremur hefur hann unnið 32 titla með félagsliðum og landsliðum.

Ronaldo hefur skorað 800 mörk fyrir félagslið og landslið og er meðal markahæstu leikmanna allra tíma. Hann er sá fyrsti til að ná 50 mörkum sex sinnum í röð með félagi sínu, sá fyrsti til að ná 100 mörkum í Evrópukeppnum og er markahæstur í Meistaradeild Evrópu.

Leikni Ronaldo með boltann er mikil og er hann með mestu jafnvígur á báða fætur og getur því spilað báðum megin á vellinum. Hann er þekktur fyrir skærin sem hann tekur með fótunum.

Ævi

Ronaldo fæddist þann 5. febrúar 1985 á Funchal á Madeira-eyjum. Hann var yngsti sonur foreldra sinna, Maria Dolores dos Santos Aveiro og José Dinis Aveiro. Hann fékk seinna nafn sitt í höfuð á þáverandi Bandaríkjaforseta Ronald Reagan, en Reagan var í miklu uppáhaldi hjá föður Ronaldo. Ronaldo á einn eldri bróður, Hugo, og tvær eldri systur, þær Elma og Liliana Cátia. Ronaldo á fjögur börn: Eitt með núverandi konu sinni, tvíbura sem staðgöngumóður gekk með og einn son hverrar barnsmóður hann hefur ekki gefið upp.

Sporting CP

Þegar Ronaldo var tólf ára var hann farinn að hlaupa af sér fullorðna menn og gat því hæglega spilað með eldri flokkum í félagi sínu. Ferilinn hóf hann hjá Nacional stærsta liði Madeira-eyja, en fór fljótlega til Sporting Lissabon og í fyrsta leik sínum skoraði hann tvö mörk, draumabyrjun hjá liðinu sem hann hafði alla tíð haldið með. Alex Ferguson tók eftir honum í æfingaleik sem Manchester United spilaði við Sporting Lissabon og fékk strax áhuga á að fá hann til liðs við Manchester United. Lærisveinar hans sögðu við hann að hann yrði að kaupa piltinn og svo fór að hann var keyptur haustið 2003.

Manchester United

Ronaldo varð fyrsti Portúgalinn í herbúðum United þegar hann var keyptur á £12.24 milljónir punda árið 2003. Hann bað um treyju númer 28 (númerið hans hjá Sporting) en Ferguson sagði að hann skildi bera treyju nr. 7 sem er í goðsagnakennd í herbúðum United en leikmenn eins og David Beckham og Eric Cantona hafa borið þetta númer. Fyrsti leikur Ronaldos fyrir Manchester United var gegn Bolton Wanderers í 4-0 sigri. Hans fyrsta mark var úr aukaspyrnu var hins vegar gegn Portsmouth þann 1. nóvember 2003 í 3-0 sigri þeirra rauðklæddu. Fyrsti titill Ronaldos með Manchester United var þegar liðið varð bikarmeistari leiktíðina 2003-04. Síðan þá vann hann ensku úrvalsdeildina meðliðinu 3 sinnum, deildarbikarinn og samfélagsskjöldinn tvisvar og United orðið Evrópumeistari- og heimsmeistari félagsliða einu sinni en það var árið 2008.

Þann 11. júní 2009 samþykkti Manchester United kauptilboð Real Madrid í Ronaldo upp á 80 milljónir punda eða 13 milljarða íslenskra króna.

Real Madrid

Um 80.000 aðdáendur hylltu Ronaldo á kynningu hans á Santiago Bernabéu þegar hann kom til Real árið 2009. Ronaldo spilaði fyrstu undir númerinu 9 þar sem 7 var upptekið af Raúl en tímabilið 2010-2011 fékk hann aftur treyju númer 7. Á tímabilinu 2011–12 skoraði hann 60 mörk í öllum keppnum og hafði aldrei skorað svo mikið. En tímabilið 2014–15 sló hann það með 61 mark. Tímabilið 2014-2015 skoraði Ronaldo 5 mörk í 9–1 sigri á Granada. Real Madrid hafði unnið 22 leiki í röð í byrjun tímabils áður en það tapaði gegn Valencia. Tímabilið 2015–16 fór Ronaldo fram úr Raúl sem mesti markaskorari liðsins með 230 mörk. Hann hafði þá skorað meira en 50 mörk á tímabilinu sjötta skiptið í röð.

Í lok árs 2016 skoraði Ronaldo 500. mark sitt í öllum keppnum (377 fyrir Madrid, 118 fyrir Manchester United og 5 fyrir Sporting Lisbon). Hann skrifaði undir samning við Real Madrid þangað til árið 2021.

Árið 2017 í úrslitum Meistaradeildarinnar, skoraði hann tvö mörk í sigri gegn Juventus og varð markahæstur í Meistaradeildinni fimmta árið í röð.

Juventus

Eftir HM 2018 tilkynnti Ronaldo að hann myndi yfirgefa Real Madrid. Hann gerði 4 ára samning við ítölsku meistarana Juventus.

Ronaldo skoraði sína fyrstu þrennu í Serie A janúar 2020. Hann varð annar til að skora þrennu í Serie A, La Liga og Premier League ( á eftir Alexis Sánchez). En fyrstur til að skora fleiri en 50 mörk í áðurnefndum deildum. Hann varð markahæstur tímabilið 2020-2021 í Serie A.

Landslið Portúgals

Fyrsti landsliðsleikur Ronaldo var fyrir Portúgal gegn Kasakstan haustið 2003 og skoraði hann eina mark liðs síns í upphafsleik Evrópumeistaramótsins 2004 gegn Grikkjum. Ronaldo er fyrirliði portúgalska landsliðsins. Árið 2016 varð Ronaldo Evrópumeistari með landsliðinu. Ronaldo skoraði þrennu gegn Spáni á HM 2018 og alls 4 mörk í keppninni. Portúgal var þó slegið út í 16 liða úrslitum.

Ronaldo er markahæsti landsliðsmaður Portúgals og markahæsti landsliðsmaður allra tíma (met sem hann deilir með Írananum Ali Daei). Hann er eini Evrópubúinn sem hefur skorað yfir 100 landsliðsmörk.

Árið 2021 sló hann met Michel Platini yfir flest mörk skoruð í lokakeppni Evrópumótsins þegar hann skoraði 2 mörk í lok leiks gegn Ungverjalandi á EM 2021. Við það komst hann í 11 mörk í keppninni. Hann var einnig markahæstur í keppninni, ásamt Tékkanum Patrick Schick, en hlaut gullskóinn vegna fleiri stoðsendinga.

Titlar og verðlaun

Sporting CP

• Supertaça Cândido de Oliveira: 2002

Manchester United

• Premier League: 2006–07, 2007–08, 2008–09
• FA Cup: 2003–04
• Football League Cup: 2005–06, 2008–09
• FA Community Shield: 2007
• UEFA Champions League: 2007–08
• FIFA Club World Cup: 2008

Real Madrid

• La Liga: 2011–12, 2016–17
• Copa del Rey: 2010–11, 2013–14
• Supercopa de España: 2012, 2017
• UEFA Champions League: 2013–14, 2015–16, 2016–17, 2017–18
• UEFA Super Cup: 2014, 2017
• FIFA Club World Cup: 2014, 2016, 2017

Juventus

• Serie A: 2018–19, 2019–20
• Coppa Italia: 2020–21
• Supercoppa Italiana: 2018, 2020

Portúgal

• UEFA Evróputitill: 2016
• UEFA Þjóðadeildin: 2018–19

Einstaklingverðlaun og afrek (listi er ekki tæmandi)

• FIFA Ballon d'Or: 2008, 2013, 2014, 2016, 2017
• FIFA leikmaður ársins: 2008
• UEFA Besti leikmaður Evrópu: 2014, 2016, 2017
• Premier League leikmaður tímabilsins: 2006–07, 2007–08
• Premier League Gullskórinn: 2007–08
• La Liga Besti leikmaðurinn: 2013–14
• Pichichi-bikarinn, markahæsti í La Liga: 2010–11, 2013–14, 2014–15
• Serie A leikmaður ársins: 2019, 2020
• Serie A markahæstur: 2020-2021
• Markahæstur á EM 2021
• Markahæstur á EM í knattspyrnu frá upphafi