Reykjavík - Rotterdam

Reykjavík-Rotterdam er íslensk kvikmynd frá árinu 2008 sem var leikstýrt af Óskari Jónassyni. Óskar skrifaði einnig handritið ásamt glæpasagnahöfundinum Arnaldi Indriðasyni. Í aðalhlutverkum eru Baltasar Kormákur og Ingvar E. Sigurðsson.

Reykjavík-Rotterdam
Auglýsingaplakat myndarinnar.
Leikstjóri	Óskar Jónasson
Handritshöfundur	Arnaldur Indriðason Óskar Jónasson
Framleiðandi	Baltasar Kormákur Agnes Johansen
Leikarar	Baltasar Kormákur Ingvar E. Sigurðsson Lilja Nótt Þórarinsdóttir Þröstur Leó Gunnarsson Victor Löw Ólafur Darri Ólafsson Jörundur Ragarsson
Frumsýning	3. október 2008
Lengd	88 mín.
Tungumál	íslenska
Aldurstakmark	Bönnuð innan 14

Myndin var tilnefnd til sex Edduverðlauna árið 2008 og vann fimm, þar á meðal Leikstjóri ársins. Myndin var frumsýnd á Íslandi þann 3. október 2008 og á 13 vikna tímabili tók myndin inn 25 milljónir íslenskra króna og varð átjánda tekjuhæsta mynd ársins á Íslandi.

Endurgerð myndarinnar á ensku undir nafninu Contraband kom út þann 13. janúar 2012 og fóru Mark Wahlberg og Kate Beckinsale með aðalhlutverkin í myndinni.

Söguþráður

Öryggisvörðurinn og fyrrverandi sjómaðurinn Kristófer sem afplánað hefur fangelsisdóm fyrir áfengissmygl berst við að halda fjölskyldu sinni á floti. Honum finnst hann reyna of mikið á besta vin sinn Steingrím sem gefur honum allt sem honum er fært. Kristófer býðst að fara í einn vel launaðan túr á flutningaskipi milli Reykjavíkur og Rotterdam. Hann slær til í þeirri von að hann geti komið sér á réttan kjöl fjárhagslega en óvæntir atburðir setja strik í reikninginn. Á meðan hann er á sjó stritar eiginkona hans Íris við að halda sér á floti, ásamt sonum þeirra Agli og Skúla. Ofsóknir frá mönnum sem Kristófer hefur í gegnum tíðina barist við fara alveg með hana og hún leitar til Steingríms eftir hjálp. Steingrímur býður þeim að halda til heima hjá sér þangað til Kristófer kemur heim. Það kemur í ljós að hann hefur staðið á bak við allar ofsóknirnar sökum þess að hann er ástfanginn af Írisi. Þá hefst barátta við tímann þegar Kristófer verður að komast heim án þess að vera tekinn með áfengið og bjarga Írisi sem var orðið ljóst hvaða mann Steingrímur hafði að geyma.

Leikarar

• Baltasar Kormákur - Kristófer
• Ingvar E. Sigurðsson - Steingrímur
• Lilja Nótt Þórarinsdóttir - Íris
• Þröstur Leó Gunnarsson - Jensen
• Victor Löw - Hoogland
• Ólafur Darri Ólafsson - Elvar
• Jörundur Ragnarsson - Arnór
• Theódór Júlíusson - Runólfur
• Jóhannes Haukur Jóhannesson - Eiríkur
• Pálmi Kormákur Baltasarsson - Skúli
• Stormur Jón Kormákur Baltasarsson - Egill

Útgáfa

Í kvikmyndahúsum

Óskar Jónasson eftir frumsýningu kvikmyndarinnar

Reykjavík-Rotterdam var frumsýnd þann 30. september 2008 í Háskólabíói fyrir troðfullum bíósal, þúsund manns. Áhorfendur voru yfirleitt hrifnir af myndinni. Leikstjóri, leikarar og handritshöfundar voru allir viðstaddir frumsýningu. Svo var slegið til veislu þegar sýningu lauk og stóð hún alla nóttina. Sýningar á myndinni hófust um allt land þann 3. október 2008 og skilaði myndin inn um það bil sex milljónum íslenskra króna fyrstu sýningarhelgina. Hún var tekjuhæsta myndin á landinu þá helgi og einnig helgina á eftir þegar þrjú þúsund manns sáu myndina. Eftir tvær vikur höfðu fjórtán þúsund manns séð myndina. Þriðju helgina datt myndin niður í annað sæti á eftir Max Payne. Myndin gekk í þrettán vikur og á þeim tíma náði Reykjavík-Rotterdam að hala inn rúmar 25 milljónir í kvikmyndahúsum.

Verðlaun

Reykjavík-Rotterdam hlaut næstflestar tilnefningar til Edduverðlaunanna 2008, tíu talsins. Kvikmyndin Brúðguminn, sem Baltasar Kormákur, aðalleikari Reykjavíkur-Rotterdams leikstýrði, fékk fjórtán tilnefningar. Reykjavík-Rotterdam vann til fimm verðlauna.

Íslenska kvikmynda- og sjónvarpsakademían valdi Reykjavík-Rotterdam sem framlag Íslands til Óskarsverðlaunanna í flokki bestu kvikmyndar á tungumáli öðru en ensku það árið en myndin var ekki tilnefnd til verðlaunanna.

Flokkur	Keppendur	Unnið
"Leikstjóri ársins"	Óskar Jónasson fyrir Reykjavík-Rotterdam Ragnar Bragason fyrir Dagvaktina Baltasar Kormákur fyrir Brúðgumann	Já
"Handrit ársins"	Arnaldur Indriðason og Óskar Jónasson fyrir Reykjavík-Rotterdam Jóhann Ævar Grímsson, Jón Gnarr, Jörundur Ragnarsson, Pétur Jóhann Sigfússon og Ragnar Bragason fyrir Dagvaktina Baltasar Kormákur og Ólafur Egill Egilsson fyrir Brúðgumann	Já
"Klipping ársins"	Elísabet Ronaldsdóttir fyrir Reykjavík-Rotterdam Valdís Óskarsdóttir fyrir Sveitabrúðkaup Sverrir Kristjánsson fyrir Dagvaktina	Já
"Hljóð ársins"	Kjartan Kjartansson fyrir Reykjavík-Rotterdam Nicolas Liebing og Björn Victorsson fyrir Latabæ Björn Viktorsson, Steingrímur Eyfjörð og Bogi Reynisson fyrir Rafmögnuð Reykjavík	Já
"Tónlist ársins"	Barði Jóhannsson fyrir Reykjavík-Rotterdam Sigurður Bjóla og Jón Ólafsson fyrir Brúðgumann The Tiger Lillies fyrir Sveitabrúðkaup	Já
"Bíómynd ársins"	Reykjavík-Rotterdam Brúðguminn Sveitabrúðkaup	Nei
"Leikari ársins í aðalhlutverki"	Baltasar Kormákur fyrir Reykjavík-Rotterdam Pétur Einarsson fyrir Konfektkassann Hilmir Snær Guðnason fyrir Brúðgumann	Nei
"Búningar ársins"	Helga I. Stefánsdóttir fyrir Brúðgumann Helga Rós V. Hannam fyrir Reykjavík-Rotterdam María Ólafsdóttir fyrir Latabæ	Nei
"Gerfi ársins"	Áslaug Dröfn Sigurðardóttir fyrir Reykjavík-Rotterdam Ásta Hafþórsdóttir fyrir Latabæ Ragna Fossberg fyrir Spaugstofuna	Nei
"Leikmynd ársins"	Haukur Karlsson fyrir Reykjavík-Rotterdam Snorri Freyr Hilmarsson fyrir Latabæ Atli Geir Grétarsson og Grétar Reynisson fyrir Brúðgumann	Nei