Sagan af bláa hnettinum

Sagan af bláa hnettinum er barnabók eftir íslenska rithöfundinn Andra Snæ Magnason, myndskreytt af Áslaugu Jónsdóttur. Bókin kom út árið 1999 og hlaut Íslensku bókmenntaverðlaunin það ár, fyrst allra barnabóka. Auk þess hlaut hún Janusz Korczak heiðursverðlaunin árið 2000 og Vestnorrænu Barnabókaverðlaunin árið 2001. Vinsælt leikrit, Blái hnötturinn, var gert eftir bókinni og það sýnt í Þjóðleikhúsinu árið 2001 auk þess sem það hefur verið sýnt í fleiri löndum.

Bókin hefur verið þýdd á fjölmörg tungumál, þar á meðal: dönsku, ensku, sænsku, eistnesku, taílensku, grænlensku, frönsku, spænsku, ítölsku, finnsku, færeysku og kóresku.