Flateyjardalsheiði

Flateyjardalsheiði

Flateyjardalsheiði er heiðardalur á skaganum milli Eyjafjarðar og Skjálfandaflóa, þar sem áður var nokkur byggð. Heiðin nær frá Fnjóskadal í suðri til Eyvindarár og Urðargils í norðri, en þar fyrir norðan er Flateyjardalur, sem heiðin dregur nafn sitt af. Áin Dalsá rennur um heiðina, en fjöll girða hana austan- og vestanmegin.

Á heiðinni, séð til norðurs

Á heiðinni má sjá nokkra smájökla, þar á meðal Kambsmýrarjökul.

Fjallgarðurinn vestan heiðarinnar heitir ekki neitt, en meðal fjalla austan hennar má nefna Víknafjöll (sem er farið um til að komast í Náttfaravíkur), Háu-Þóru, Lágu-Þóru, tvo Bræður, tvo Stráka, Siggu, Viggu og nyrst er fjall sem heitir Hágöngur. Kinnarfjöll eru suðaustan megin á heiðinni, þar er t.d. Kambsmýrarhnjúkur. Vestan ósa Skjálfandafljóts í botni flóans er fjall sem heitir ýmist Bakrangi, Ógöngufjall eða Galti, eftir sjónarhorninu.

Norðurmörk Flateyjardalsheiðar eru um Eyvindará vestan Dalsár en Urðargil austan hennar. Þar fyrir norðan var Flateyjarhreppur, en heiðin sjálf tilheyrði Hálshreppi og sóttu íbúarnir kirkju til Fnjóskadals, fyrir utan heimilismenn á Eyvindará, sem höfðu undanþágu til að sækja kirkju á Brettingsstöðum.

Eftir allri heiðinni liggur vegur (F899) sem er fær jeppum og sumum fólksbílum.

Átta eyðibýli eru á Flateyjardalsheiði:

• Eyvindará, í eyði 1872
• Ófeigsá, í eyði 1870
• Heiðarhús, í eyði 1904
• Grímsland, í eyði 1904
• Kambsmýrar, í eyði 1929
• Austari-Krókar, í eyði 1946
• Vestari-Krókar, í eyði 1935
• Þúfa, í eyði 1935

Tengt efni

• Flateyjardalur
• Flatey á Skjálfanda

Heimildir

• Eyðibyggðin Geymt 19 ágúst 2007 í Wayback Machine í Fjörðum og nærsveitum, á heimasíðu ferðafélagsins Fjörðunga;
• Valgarður Egilsson: Örnefni við Eyjafjörð Geymt 18 júlí 2007 í Wayback Machine, á heimasíðu Örnefnastofnunar.