Alma Möller
Alma Dagbjört Möller (f. 24. júní 1961) er íslenskur svæfinga- og gjörgæslulæknir sem var skipuð landlæknir árið 2018 og er fyrsta konan sem gegnir embættinu.
Fjölskylda breyta
Alma fæddist á Siglufirði og foreldrar hennar eru hjónin Jóhann Georg Möller (1918-1997) verkstjóri og bæjarfulltrúi Alþýðuflokksins á Siglufirði og Helena Sigtryggsdóttir húsmóðir (f.1923). Alma er yngst sex systkina[1] og er gift Torfa Fjalari Jónassyni hjartalækni[2] og eiga þau tvö börn.
Menntun og starfsferill breyta
Hún ólst upp á Siglufirði en lauk stúdentsprófi frá Menntaskólanum á Akureyri árið 1981, læknaprófi frá Háskóla Íslands árið 1988, sérfræðinámi í svæfingum og gjörgæslu við Háskólasjúkrahúsið í Lundi í Svíþjóð árið 1995 og prófi Evrópsku svæfingalæknasamtakanna árið 1996. Hún varði doktorsritgerð sína við Háskólann í Lundi árið 1999 og hefur einnig lokið meistaraprófi í stjórnun heilbrigðisþjónustu og lýðheilsu og hlotið sérfræðiviðurkenningu í heilbrigðisstjórnun.[3] Skömmu eftir að hún tók við embætti landlæknis lauk hún diplómanámi í opinberri stjórnsýslu frá Háskóla Íslands.
Alma starfaði sem sérfræðingur við Háskólasjúkrahúsið í Lundi í Svíþjóð frá 1993-2002. Árið 2002 fluttist hún til Íslands og tók við starfi yfirlæknis á gjörgæsludeildum Landspítala í Fossvogi og við Hringbraut. Frá árinu 2014-2018 var hún framkvæmdastjóri aðgerðasviðs Landspítala.[4] Þann 1. apríl 2018 tók Alma við embætti landlæknis og er fyrsta konan sem gegnir embættinu í 258 ára sögu þess.[5] Alma var einnig fyrsta konan sem starfaði sem þyrlulæknir Landhelgisgæslunnar en hún var þyrlulæknir frá 1990-1992.[6]
Alma var sæmd riddarakrossi Hinnar íslensku fálkaorðu fyrir störf í þágu heilbrigðismála þann 17. júní 2020.[7]
Frá 2020 til 2022 var Alma áberandi í fjölmiðlum og upplýsingafundum vegna Kórónaveirufaraldursins sem þá gekk yfir.
Tilvísanir breyta
- ↑ „Minningagreinar: Jóhann Georg Möller“, Morgunblaðið, 5. júlí 1997 (skoðað 13. mars 2020)
- ↑ Mbl.is, „Landlæknir færði fálkaunganum Kríu rjúpu“ (skoðað 13. mars 2020)
- ↑ „Doktorsvörn í læknisfræði“, Morgunblaðið, 14. janúar 2000 (skoðað 31. júlí 2019)
- ↑ Siglfirðingur.is, „Alma skipuð landlæknir“[óvirkur tengill] (skoðað 31. júlí 2019)
- ↑ Landlæknir.is, „Alma Dagbjört Möller tekin við embætti landlæknis“ Geymt 31 júlí 2019 í Wayback Machine (skoðað 31. júlí 2019)
- ↑ Mbl.is, „Notar læknagenin áfram“, (skoðað 13. mars 2020)
- ↑ Bjarni Pétur Jónsson (17. júní 2020). „Þríeykið fékk fálkaorðuna“. RÚV. Sótt 17. júní 2020.