Þórólfur Guðnason
Þórólfur Guðnason (f. 28. október 1953 í Vestmannaeyjum) er íslenskur læknir, doktor í smitsjúkdómum barna og fyrrum sóttvarnalæknir.
Hann lauk stúdentsprófi frá Menntaskólanum á Laugarvatni árið 1973 og embættisprófi í læknisfræði frá Háskóla Íslands 1981. Hann stundaði nám í almennum barnalækningum á Íslandi og í Bandaríkjunum 1984-1988 og nám í smitsjúkdómum barna í Bandaríkjunum 1988-1990.[1]
Eiginkona Þórólfs er Sara Hafsteinsdóttir, yfirsjúkraþjálfari á Landspítala háskólasjúkrahúsi, Fossvogi, og eiga þau tvo syni.
Þórólfur Guðnason varði doktorsritgerð sína í lýðheilsuvísindum við Læknadeild Háskóla Íslands. Ritgerðin ber heitið „Sýkingar og sýklun pneumókokka hjá börnum á íslenskum leikskólum – faraldsfræði, áhættuþættir og íhlutandi aðgerðir“ (Infectious illnesses and pneumococcal carriage among preschool children at Icelandic day care centers – epidemiology, risk factors and intervention).
Þórólfur varð landsþekktur fyrir störf sín sem sóttvarnalæknir í mars 2020 vegna upplýsingafunda um COVID-19. Þau Þórólfur, Alma Möller og Víðir Reynisson hlutu viðurnefnið „þríeykið“ í fjölmiðlaumfjöllun á tíma faraldursins.[2] Þórólfur var sæmdur riddarakrossi Hinnar íslensku fálkaorðu fyrir störf í þágu heilbrigðismála þann 17. júní 2020.[3] Hann var manneskja ársins á Rás 2 2020 (ásamt Ölmu og Víði) og 2021.
Þórólfur ákvað að hætta starfi sem sóttvarnarlæknir í september 2022 og tók þá Guðrún Aspelund við starfinu.
Tilvísanir
breyta- ↑ „Þórólfur Guðnason“. www.mbl.is. Sótt 18. apríl 2020.
- ↑ Andri Yrkill Valsson (14. apríl 2020). „Þríeykið fastur liður á óvissutímum - en ekki í dag“. RÚV. Sótt 19. október 2024.
- ↑ Bjarni Pétur Jónsson (17. júní 2020). „Þríeykið fékk fálkaorðuna“. RÚV. Sótt 17. júní 2020.