Múmínálfarnir

Múmínálfarnir (sænska: Mumintrollen) eru aðalpersónurnar í bókaröð og myndasögum eftir finnlandssænska rithöfundinn og myndlistarkonuna Tove Jansson, sem gefnar voru út á árunum 1945 til 1970. Þær voru skrifaðar á sænsku og gefnar út fyrst að finnska bókaforlaginu Schildts Förlags Ab sem sérhæfir sig í útgáfu á sænsku í Finnlandi. Þær hafa verið þýddar á ein 43 tungumál og nokkrar þeirra þar á meðal á íslensku.

Nokkrar helstu persónurnar í sögunum um Múmínálfana talið frá vinstri: Snabbi, Snúður, Múmínpabbi, Múmínmamma, Múmínsnáðinn, Mimla, Morrinn, Snorkstelpan og Hattífattarnir.

Auk níu skáldsagna um Múmínálfana skrifaði Tove Jansson og myndskreytti fimm myndabækur, samdi teiknimyndasögur fyrir dagblöð með bróður sínum Lars Jansson sem birtust í enskum dagblöðum og lög innblásin af persónunum hafa verið gefin út. Einnig hafa verið gerðar teikni - og brúðumyndir fyrir sjónvarp um Múmínálfana, þær þekktustu í Póllandi og Japan auk teiknimynda í fullri lengd. Teiknimyndir um Múmínálfana hafa verið sýndar í íslenska Ríkissjónvarpinu nokkrum sinnum.

Skemmtigarðurinn Múmínheimur í Naantali í Finnlandi sem var opnaður árið 1993, er helgaður þeim, sem og safnið The Museum Moomin Valley í Tampere, en þar eru geymdar upprunalegar teikningar ásamt handunnum leirbrúðum Tove og öðru efni sem tengist Múmínálfunum og sögu þeirra.

Bækurnar fjalla um Múmínálfana og vini þeirra og nágranna í Múmíndal. Múmínálfarnir eiga heima í Múmínhúsinu, sem er há, blá, sívöl bygging. Þeir eru hvítir á litinn og minna á flóðhesta í útliti.

Bækur

Fyrsta sagan um múmínálfana hét Småtrollen och den stora översvämningen og kom út árið 1945. Fyrsta múmínálfabókin sem kom út á íslensku var Pípuhattur galdrakarlsins sem kom út árið 1968 í þýðingu Steinunnar S. Briem.

Småtrollen och den stora översvämningen (Litlu álfarnir og stóra flóðið) - 1945.
Kometjakten / Kometen kommer (Halastjarnan) - 1946/1968/2010.
Trollkarlens hatt (Pípuhattur galdrakarlsins) - 1948.
Muminpappans bravader / Muminpappans memoarer(Minningar Múmínpabba) - 1950.
Farlig midsommar (Örlaganóttin) - 1954.
Trollvinter (Vetrarundur í Múmíndal) - 1957.
Det osynliga barnet (Ósýnilega barnið og aðrar sögur) - 1969.
Pappan och havet (Eyjan hans Múmínpabba) - 1965.
Sent i November (Seint í nóvember) - 1970.

Sögupersónur

Listi yfir nokkrar sögupersónur í bókunum og teiknimyndunum um múmínálfana.

Tenglar

Opinber vefur Múmínálfanna Geymt 7 mars 2005 í Wayback Machine (á ensku)
Opinber vefur Múmínálfanna á japönsku
Hver er flottasti múmínálfurinn? á Murinn.is
Moomin Voices / Muminröster Geymt 5 desember 2008 í Wayback Machine
Grenitréð; jólasaga úr ríki Múmínálfana; birtist í Lesbók Morgunblaðsins 1983