EV5 Via Romea Francigena

EV5 Via Romea Francigena er 3.900 km löng EuroVelo-hjólaleið sem liggur frá London til Rómar og endar í ítölsku hafnarborginni Brindisi. Leiðin liggur um England, Frakkland, Belgíu, Lúxemborg, Frakkland aftur, Sviss og Ítalíu. Nafnið þýðir „vegurinn til Rómar frá Frakklandi“ og er dregið af gamalli leið frá Frakklandi til Rómar yfir Alpafjöll. Til er gömul pílagrímaleið frá Kantaraborg til Rómar sem nefnist Via Francigena og er vinsæl gönguleið. Sigríkur alvarlegi erkibiskup af Kantaraborg lýsti þessari leið á 11. öld.

Kort sem sýnir EV5.

Leiðin

• England: Í Englandi fylgir leiðin 182 km hjólaleið sem er hluti af National Cycle Network-leið 1 frá Greenwich, um Rochester, Kantaraborg og Sandwich til Dover þaðan sem ferja fer til Frakklands.
• Frakkland: Frá Calais liggur leiðin um Béthune og Lille til Roubaix og síðan yfir landamærin til Belgíu.
• Belgía: Í Belgíu fylgir leiðin flæmsku LF-leiðinni nr. 6 frá landamærunum að Brussel og síðan til Namur og Martelange.
• Lúxemborg: Leiðin gegnum Lúxemborg er 107 km að lengd og liggur á hjólastígum gegnum Strassen, Lúxemborg, Hesperange og Schengen að frönsku landamærunum.
• Frakkland: Leiðin fylgir skipaskurðum um héruðin Lorraine og Elsass. Hún liggur 65 km eftir Canal des houillères de la Sarre frá Sarreguemines til Gondrexange, 75 km eftir Canal de la Marne au Rhin frá Gondrexange til Strassborgar, 30 km eftir Canal de la Bruche frá Strassborg til Soultz-les-Bains, eftir Elsassvínleiðinni frá Soultz-les-Bains til Cernay og að síðustu 50 km í gegnum Ochsenfeld um bæina Battenheim, Baldersheim, Mulhouse, Kembs og Saint-Louis.
• Sviss: Leiðin fylgir Nationale Velorouten-leið 3 frá Basel um Júrafjöll, Aarau, Luzern, Vierwaldstättersee, Andermatt, Gotthardskarð, Bellinzona, Monte Ceneri-skarð, Luganovatn, Mendrisio og Chiasso.
• Ítalía: Leiðin fylgir fyrirhugaðri BicItalia-leið 3 (Ciclovia dei Pellegrini) sem fylgir gömlu pílagrímaleiðinni og fer um borgirnar Mílanó, Pavía, Fidenza, Piacenza, Parma, Berceto, Aulla, Flórens, Siena, Bolsena til Rómar, og síðan um Fiuggi, Cassino, Benevento, Candela, Gravina in Puglia, og Tarantó til Brindisi.

Myndir

• 
  EV5 í Kemsley í Kent.
• 
  EV5 milli Whitstable og Kantaraborgar í Kent.
• 
  EV5 meðfram Saar-skurðinum í Lorraine.

Tenglar

• Vefur leiðarinnar