Ástjörn (Hafnarfirði)

Ástjörn er tjörn í Hafnarfirði. Tjörnin er í kvos vestan undir Ásfjalli. Í og í kringum tjörnina er auðugt gróður og dýralíf. Tjörnin og umhverfi hennar er friðað og er stærð friðlandsins 28,5 hektarar. Göngustígur liggur umhverfis tjörnina en á varptíma fugla 1. maí til 15. júlí er umferð um hann ekki heimil.

Mynd af Ástjörn.

Í Ástjörn vex ýmis vatnagróður svo sem grasnykra,hjartanykra og síkjamari. Tjarnalaukur er einkennisplanta tjarnarinnar en hann þekur botninn á stórum svæðum. Í mýrinni við Ástjörn má finna mýrastör, gulstör og tjarnastör.

Fuglalíf við Ástjörn

Yfir varptímann er fjölbreytt fuglalíf við Ástjörn og hafa þar sést rúmlega 50 tegundir fugla en af þeim eru 10 tegundir sem verpa þar að staðaldri. Flórgoði verpir þar og er Ástjörn eina þekkta varpsvæði flórgoða á Suðvesturlandi. Meðal annarra tegunda varpfugla sem verpa þar eru stokkönd, heiðlóa, hettumáfur, hrossagaukur, skógarþröstur,þúfutittlingur og kría.

Tengill

• Kort af friðlandi Ástjarnar og Ásfjalls