Ásgeir Blöndal Magnússon
Ásgeir Blöndal Magnússon (2. nóvember 1909 – 25. júlí 1987) var málfræðingur, forstöðumaður Orðabókar Háskólans og sá lengi um þættina Daglegt mál í Ríkisútvarpinu. Á síðari árum ævi sinnar vann hann að orðsifjaorðabók sem kom út að honum látnum.
Líf
breytaHann fæddist 2. nóvember árið 1909 í Arnarfirði en ólst að mestum hluta upp í Þingeyri. Hann stundaði nám við Menntaskólann á Akureyri og lauk stúdentsprófi þaðan árið 1942 og cand.mag.-prófi frá Háskóla Íslands árið 1946.
Ásgeir varð starfsmaður við Orðabók Háskóla Íslands, var orðabókarritstjóri 1947-1978 og var þá settur forstöðumaður verksins, orðabókarstjóri, en lét af störfum fyrir aldurs sakir í árslok 1979. Auk þess sinnti hann stundakennslu við Háskóla Íslands í gotnesku, germanskri samanburðarmálfræði og í íslenskri málfræði. Síðustu árin vann hann að samningu orðsifjabókar og lauk frágangi á henni daginn áður en hann lést.
Ásgeir var formaður Félags ungra kommúnista á sínum yngri árum, starfaði í Kommúnistaflokki Íslands og sat í miðstjórn Sameiningarflokks alþýðu – Sósíalistaflokksins, og Alþýðubandalagsins. Hann sat í stjórn Bókasafns Kópavogs 1957-70 og hafði umsjón með þættinum Íslenskt mál í Ríkisútvarpinu í 30 ár. Hann var gerður að heiðursdoktor við heimspekideild Háskóla Íslands árið 1986, við 75 ára afmæli Háskóla Íslands en lést árið 1987.
