Lionel Jospin

Lionel Jospin (f. 12. júlí 1937) er franskur stjórnmálamaður sem var forsætisráðherra Frakklands frá 1997 til 2002. Jospin var frambjóðandi franska Sósíalistaflokksins í forsetakosningunum árin 1995 og 2002. Í fyrri kosningunum tapaði hann naumlega fyrir Jacques Chirac í seinni umferðinni. Í kosningunum 2002 komst hann öllum að óvörum ekki í aðra umferð kosninganna þar sem hann fékk færri atkvæði en bæði Chirac og öfgahægrimaðurinn Jean-Marie Le Pen í fyrri umferðinni. Eftir þennan auðmýkjandi ósigur dró Jospin sig alfarið úr frönskum stjórnmálum.

Lionel Jospin
Delanoe Zenith 2008 02 27 n19.jpg
Forsætisráðherra Frakklands
Í embætti
2. júní 1997 – 6. maí 2002
Persónulegar upplýsingar
Fæddur12. júlí 1937 (1937-07-12) (83 ára)
Meudon, Hauts-de-Seine, Frakklandi
ÞjóðerniFranskur
StjórnmálaflokkurSósíalistaflokkurinn
MakiÉlisabeth Dannenmuller (skilin)
Sylviane Agacinski
BörnEva
Hugo
HáskóliStjórnmálaháskóli Parísar
Þjóðlegi stjórsýsluháskólinn
StarfStjórnmálamaður
Undirskrift

ÆviágripBreyta

Jospin gekk í Stjórnmálaháskóla Parísar og Þjóðlega stjórsýsluháskólann og vann snemma á ferli sínum sem erindreki. Hann var snemma meðlimur í frönsku trotskíistasamtökunum Organisation communiste internationaliste[1] en gekk í franska Sósíalistaflokkinn árið 1971. Jospin varð fyrsti ritari Sósíalistaflokksins á fyrra kjörtímabili François Mitterrand Frakklandsforseta (1981 – 1988). Á seinna kjörtímabili Mitterrand var Jospin ríkisráðherra, menntamálaráðherra og „næstráðandi ríkisstjórnarinnar“ í stjórnum Michels Rocard og Édith Cresson.

Jospin var kjörinn frambjóðandi Sósíalistaflokksins í forsetakosningunum árið 1995 en tapaði í annarri umferð kosninganna fyrir Jacques Chirac. Jospin varð aftur fyrsti ritari Sósíalistaflokksins næsta október. Sósíalistaflokkurinn vann sigra í þingkosningum árið 1997 og því neyddist Chirac til þess að skipa Jospin forsætisráðherra nýrrar ríkisstjórnar. Sem leiðtogi bandalags franskra vinstriflokka stóð Jospin meðal annars fyrir því að komið var á 35 klukkustunda vinnuviku í Frakklandi og fyrir ýmsum velferðarverkefnum sem miðuðu að því að auðvelda ungu fólki aðgang að atvinnugeiranum.

Jospin var aftur frambjóðandi Sósíalistaflokksins í forsetakosningunum árið 2002 en hann tapaði í fyrstu umferð fyrir Chirac og Jean-Marie Le Pen, frambjóðanda frönsku Þjóðfylkingarinnar. Hann sagði í kjölfarið af sér sem forsætisráðherra og lýsti yfir að hann hygðist draga sig úr frönskum stjórnmálum.[2] Ríkisstjórn Jospin var á þessum tíma sú langlífasta í sögu fimmta lýðveldisins.

Jospin varð meðlimur franska stjórnlagaþingsins árið 2015.

TilvísanirBreyta

  1. Lionel Jospin, Lionel raconte Jospin, éditions du Seuil, París, janúar 2010.
  2. Soirée électorale : élection présidentielle 1er tour, France 3, 21. apríl 2002.


Fyrirrennari:
Alain Juppé
Forsætisráðherra Frakklands
(2. júní 19976. maí 2002)
Eftirmaður:
Jean-Pierre Raffarin