F. J. Robinson, vísigreifi af Goderich

Frederick John Robinson, fyrsti jarlinn af Ripon, (1. nóvember 1782 – 28. janúar 1859), kallaður hinn háttvirti F. J. Robinson til ársins 1827 og Vísigreifinn af Goderich frá 1827 til 1833, var breskur stjórnmálamaður sem var forsætisráðherra Bretlands frá ágúst 1827 til janúar 1828.

Vísigreifinn af Goderich
Forsætisráðherra Bretlands
Í embætti 31. ágúst 1827 – 21. janúar 1828
Þjóðhöfðingi	Georg 4.
Forveri	George Canning
Eftirmaður	Hertoginn af Wellington
Persónulegar upplýsingar
Fæddur	1. nóvember 1782 Skelton-on-Ure, Yorkshire, Englandi
Látinn	28. janúar 1859 (76 ára) Putney Heath, Surrey, Englandi
Stjórnmálaflokkur	Torýar (1806–1834) Íhaldsflokkurinn (1834–1846)
Maki	Sarah Hobart (g. 1814)
Háskóli	St. John's College (Cambridge)

Robinson var kominn af landeignaraðli úr landsbyggðinni og hóf stjórnmálaferil sinn með hjálp fjölskyldutengsla. Eftir að ná kjöri á neðri deild breska þingsins vann hann sig upp metorðastigann með hverju aðstoðarráðherraembættinu á fætur öðru og varð árið 1818 forseti viðskiptaráðsins. Árið 1823 varð hann fjármálaráðherra og gegndi því embætti í fjögur ár. Hann hlaut aðalsnafnbót árið 1827 og gerðist leiðtogi lávarðadeildar breska þingsins og stríðs- og nýlendumálaráðherra.

Þegar George Canning forsætisráðherra lést í embætti árið 1827 gerðist Goderich forsætisráðherra í hans stað en tókst ekki að halda saman veikbyggðu stjórnarsamstarfi Tory-manna og Vigga sem Canning hafði stofnað. Goderich sagði af sér eftir 144 daga í embætti, en þetta var stysta embættistíð breskra forsætisráðherra utan þeirra sem dóu í embætti.

Goderich var síðar meðlimur í ríkisstjórnum tveggja eftirmanna sinna, Jarlsins af Grey og Sir Roberts Peel.

Tilvísanir

Fyrirrennari: George Canning

Forsætisráðherra Bretlands (31. ágúst 1827 – 21. janúar 1828)

Eftirmaður: Hertoginn af Wellington