Eyþór Arnalds
Eyþór Laxdal Arnalds (24. nóvember 1964[1]) er íslenskur stjórnmálamaður, tónlistarmaður og stjórnandi í viðskiptalífinu. Eyþór hóf ungur að spila á hljóðfæri og leika í leikhúsum. Eyþór hefur spannað klassíska, minimalíska og popptónlist á Íslandi og víðar. Hann var forstjóri Strokks Energy, Íslandssíma (nú Vodafone á Íslandi), framkvæmdastjóri hjá OZ og Enpocket sem bæði voru keypt af Nokia.
Tónlist
breytaEyþór lærði tónsmíðar hjá Atla Heimi Sveinssyni og Louis Andriessen. Hann stundaði sellónám hjá Gunnari Kvaran og framhaldsnám hjá Frances Marie Uitti. Hann hefur samið tónlist fyrir leikhús, dansverk, kvikmyndir og sinfóníuhljómsveitir. Hann var í pönkhljómsveitinni Tappi tíkarrass með Björk og fleirum. Síðar stofnaði hann rokk/popp-sveitina Todmobile með Þorvaldi Bjarna Þorvaldssyni og Andreu Gylfadóttur.
Stjórnmál
breytaEyþór hefur setið í borgarstjórn Reykjavíkur, stjórn Orkuveitu Reykjavíkur, verið formaður Þjóðleikhússráðs auk fjölmargra annara trúnaðarstarfa.
Hann hefur verið kjörræðismaður Botswana á Íslandi frá 1998.
Hann var oddviti Sjálfstæðismanna í Árborg og formaður bæjarráðs frá 2010-2014 eftir að D-listinn vann yfir 50% atkvæða og hreinan meirihluta.
Eyþór var oddviti Sjálfstæðisflokksins í Reykjavík í sveitarstjórnarkosningunum árið 2018. Í kosningunum fékk Sjálfstæðisflokkurinn 30,8 prósent atkvæða, mest allra flokka[2], en tókst þó ekki að mynda meirihluta. Eyþór sat því í minnihluta sem borgarfulltrúi Sjálfstæðisflokksins í Reykjavík kjörtímabilið 2018-2022.
Eyþór hafði hug á að bjóða sig aftur fram í oddvitasæti Sjálfstæðisflokksins í Reykjavík í sveitarstjórnarkosningum árið 2022 en þann 21. desember 2021 lýsti hann því yfir að hann hygðist draga framboð sitt til baka.[3] ´
Viðskipti
breytaEyþór hefur verið frumkvöðull í nýsköpunarfyrirtækjum. Hann starfaði hjá OZ og Enpocket, var forstjóri Íslandssíma (nú Vodafone á Íslandi), stofnaði Strokk Energy og stóð að uppbyggingu Becromal, Special Tours og annara fyrirtækja á Íslandi. Hann hefur komið að rekstri fjölda fyrirtækja á Íslandi og erlendis. Hann er hluthafi í Þórsmörk, móðurfélagi Árvakurs útgefanda Morgunblaðsins með um 10% hlut. Eyþór hefur verið einn stærsti hluteigandinn í Morgunblaðinu frá árinu 2017. Hann keypti hlut sinn í Morgunblaðinu árið 2017 af sjávarútvegsfélaginu Samherja með 225 milljón króna seljendaláni sem félag Samherja veitti honum. Lánið hefur síðan að mestu verið afskrifað.[4][5]
Tilvísanir
breyta- ↑ „Dagur í lífi Eyþórs Arnalds“. DV. 26. janúar 2018. Sótt 12. júní 2018.
- ↑ „Úrslit úr stærstu sveitarfélögum“. mbl.is. Sótt 12. júní 2018.
- ↑ „Eyþór Arnalds dregur framboð sitt til baka“. Vísir. 21. desember 2021. Sótt 21. desember 2021.
- ↑ Steindór Grétar Jónsson (23. nóvember 2019). „Fjölskyldufyrirtækið sem teygir sig um allan heim“. Stundin. Sótt 17. desember 2019.
- ↑ „Eyþór segir ólíklegt að eignarhluturinn í Morgunblaðinu færist aftur til Samherja“. Kjarninn. 5. október 2020. Sótt 27. október 2020.