Samskip hf. eru íslenskt skipafélag sem byggist á grunni skipadeildar Sambandsins sem var stofnuð árið 1946. Skipadeildin sinnti millilandasiglingum til og frá landinu í rúmlega hálfa öld. Það var svo 1. janúar 1991 sem Samskip hf. hófu formlega starfsemi. Einskorðaðist starfsemi Samskipa fyrst við millilandasiglingar til og frá Íslandi og þjónustu tengda þeim en fljótlega voru opnaðar eigin skrifstofur í Danmörku, Hollandi, Bretlandi, Bandaríkjunum, Noregi og Svíþjóð. Félagið opnaði síðan skrifstofur í Evrópu, Asíu, Norður- og Suður-Ameríku auk Ástralíu.

Samskip hf.
Rekstrarform Hlutafélag
Staðsetning Kjalarvogi, Reykjavík
Lykilmenn Ásbjörn Gíslason (forstjóri)
Starfsemi Vöruflutningar og vörugeymsla

Er gámaflutningakerfi félagins í Evrópu, sem rekið er undir heitinu Samskip Multimodal, nú eitt stærsta sinnar tegundar þar sem lögð er áhersla á flutning á 45 feta gámum. Flutningum til og frá Íslandi er sinnt með þremur gámaskipum sem hafa viðkomu á Bretlandseyjum, meginlandi Evrópu, í Skandinavíu og í Færeyjum. Samskip hófu strandflutninga snemma árs 2013 og bjóða nú upp á siglingar frá Reykjavík með viðkomu á Ísafirði, Sauðárkróki, Akureyri og Reyðarfirði áður en siglt er á markaði erlendis.

Á Íslandi hafa Samskip einnig byggt upp landflutningakerfi, sem sinnir öllum landshlutum með tíðum ferðum. Í höfuðstöðvunum í Kjalarvogi í Reykjavík er vörumiðstöð Samskipa sem býður upp á hýsingu á almennri vöru, efna-, frysti- og kælivöru ásamt annarri þjónustu, eins og samsetningu og geta viðskiptavinir fylgst náið með stöðu eigin birgða í hýsingu. Vörumiðstöðin tengir einnig saman millilanda- og innanlandskerfi Samskipa.

Flutningar á frystum afurðum eru hluti af starfsemi félagsins, enda flytja Íslendingar út mikið af sjávarafurðum. Auk þess sér frystiflutningasvið Samskipa, Samskip Icepak Logistics, um flutninga á hitastýrðum afurðum heimshorna á milli, sem eru að stærstum hluta til sjávarafurðir, en einnig kjöt, mjólkurvörur, ávextir, grænmeti og kaffi svo eitthvað sé nefnt. Starfrækir félagið auk þess fjórar frystigeymslur, í Álasundi í Noregi og í Rotterdam í Hollandi undir merkjum FrigoCare og svo í Reykjavík og Kollafirði í Færeyjum undir merkjum Samskipa.

TenglarBreyta