Limburg (Belgía)

Limburg er hollenskumælandi hérað í Belgíu og er austasti hluti flæmska hluta landsins. Héraðið var áður miklu stærra en þegar Belgía lýsti yfir sjálfstæði 1830 hófst atburðarrás sem leiddi til þess að héraðið klofnaði í tvennt. Austurhlutinn (sem einnig heitir Limburg) tilheyrir eftir það Hollandi. Íbúar eru rúmlega 800 þúsund. Höfuðborgin heitir Hasselt.

Fáni	Skjaldarmerki
Fáni
Upplýsingar
Höfuðborg:	Hasselt
Flatarmál:	2.422 km²
Mannfjöldi:	826.690 (1. janúar 2008)
Þéttleiki byggðar:	341/km²
Vefsíða:	[1]^{[óvirkur tengill]}
Lega

Lega og lýsing breyta

Limburg er í norðaustanverðri Belgíu og á löng landamæri að Hollandi í norðri og austri. Auk þess liggja að því héruðin Antwerpen og Flæmska Brabant í vestri og Liège í suðri. Flatarmál Limburg-héraðs er 2.422 km² og er það því þriðja minnsta hérað Belgíu. Limburg á sér eitt útsvæði, sem er króað inni af Hollandi og héraðinu Liège, og heitir það Voeren. Voeren er austasta svæði Belgíu þar sem hollenska er töluð. Fljótið Maas rennur í gegnum héraðið frá suðri til norðurs, uns það hverfur inn í Holland.

Skjaldarmerki og fáni breyta

Skjaldarmerkið sýnir rautt ljón, með gula tungu, gular klær og tvö stél. Bakgrunnurinn er silfurlitur og fyrir framan ljónið er lítill röndóttur skjöldur. Ljónið var merki greifanna af Limburg áður fyrr, en skjöldurinn fyrir framan merki greifanna af Loon (sem er gamalt greifadæmi). Skjaldarberarnir eru svanur til hægri og hjörtur til vinstri. Hjörturinn er tákn Hasselt, höfuðborgar Limburgs, en svanurinn vísar til Tongeren, elstu borgar Belgíu. Skjaldarmerkið var samþykkt 1837.

Fáninn er í reynd meginhluti skjaldarmerkisins með rauða ljóninu og litla skildinum. Hann var ekki tekinn í notkun fyrr en 1996.

Orðsifjar breyta

Fylkið Limburg heitir eftir kastalavirkinu Limbourgh, sem áður fyrr var aðsetur greifanna á þessu svæði. Limbourgh er í Belgíu í dag en fylkið Limburg tilheyrði bæði Hollandi og Belgíu allt til 1830 er Belgía klauf sig frá Hollandi. Talið er að orðið Lim- merki lind eða lindardreka, samkvæmt þjóðsögum.

Söguágrip breyta

Limburg var öldum saman greifadæmi og miklu stærra en í dag. Eftir að Frakkar yfirgáfu Niðurlönd 1814 varð Limburg til fylki í sameinuðum Niðurlöndum. Talað var um að nefna fylkið Maastricht eða Maasdal eða Opper Gelder. En Vilhjálmur I. konungur ákvað að kalla fylkið Limburg. Árið 1830 klauf Belgía sig hins vegar frá Hollandi og stofnaði eigið konungsríki. Í fyrstu tilheyrði allt Limburg Belgíu. En í ágúst 1831 hertók hollenski herinn nokkrar borgir á þessu svæði til að eiga eitthvað uppi í erminni í samningum milli ríkjanna. Þetta leiddi til nokkurra orrusta milli ríkjanna. Sú mesta átti sér stað við Hasselt 8. ágúst. Í samningaviðræðum í London var komist að þeirri niðurstöðu að skipta ætti Limburg (og Lúxemborg) í tvennt. Skiptingin kom til framkvæmda 1839, þannig að austurhlutinn tilheyrir Hollandi en vesturhlutinn Belgíu.

Borgir breyta

Í Limburg eru þrjár sýslur og í þeim eru 44 sveitarfélög og borgir. Stærstu borgir Limburgs:

Röð	Bær	Íbúar	Ath.
1	Hasselt	73 þúsund	Höfuðborg héraðsins
2	Genk	64 þúsund
3	Beringen	43 þúsund
4	Sint-Truiden	39 þúsund
5	Maasmechelen	37 þúsund
6	Lommel	33 þúsund
7	Bilzen	31 þúsund
8	Heusden-Zolder	31 þúsund
9	Tongeren	30 þúsund	Talin elsta borg Belgíu
10	Houthalen-Helchteren	30 þúsund

Heimildir breyta

Fyrirmynd greinarinnar var „Limburg (Belgische provincie)“ á hollensku útgáfu Wikipedia. Sótt 18. nóvember 2012.
Fyrirmynd greinarinnar var „Provinz Limburg (Belgien)“ á þýsku útgáfu Wikipedia. Sótt 18. nóvember 2012.