Asvanstíflan

Asvanstíflan eru tvær stíflur við fyrstu flúðirnar í Níl við borgina Asvan. Stíflugerð á þessum stað hófst 1899 og þjónaði þeim tilgangi að jafna vatnsmagnið í Níl og binda þannig enda á flóð- og þurrkatímabil, auk þess að framleiða rafmagn og veita vatni í áveitukerfi til jarðræktar.

Stóra Asvanstíflan.

Bretar reistu fyrstu stífluna og lauk byggingu hennar árið 1902. Brátt kom í ljós að hún var of lág og hún var síðar hækkuð í tveimur áföngum sem lauk 1912 og 1933. Árið 1946 flæddi áin yfir stífluna og var þá ákveðið, í stað þess að hækka hana einu sinni enn, að reisa nýja stíflu 6 km ofar í ánni. Áætlanagerð hófst skömmu eftir byltingu Nassers 1952 og ætluðu Bandaríkin og Bretland fyrst að lána fé til verksins en þau drógu það til baka 1956. Egyptar þjóðnýttu þá Súesskurðinn, sem leiddi til Súesdeilunnar, og nýttu tekjurnar af honum til að fjármagna stíflugerðina. Um þriðjung kostnaðarins greiddu þó Sovétríkin með gjafafé og sovéskt verktakafyrirtæki hannaði stífluna sjálfa. Vinna við hana hófst 1960 og miðlunarlónið náði fullri hæð 1976.

Stóra Asvanstíflan er 3600 m á lengd og 111 m há. Miðlunarlónið, Nasservatn, er 480 km langt og 16 km breitt þar sem það er breiðast og þekur 6000 km² svæði.