Þingvallavatn

Þingvallavatn, til forna kallað Ölfusvatn, er stærsta náttúrulega stöðuvatn Íslands og er 83,7 km² að flatarmáli. Í Þingvallavatni eru tvær megineyjar, Sandey og Nesjaey og milli þeirra er Heiðarbæjarhólmi. Við norðanvert vatnið eru Þingvellir, suðaustan af því er Úlfljótsvatn.

Þingvallavatn

Kort.

Þar sem Þingvallavatn er dýpst er það 114 m. Mest af vatninu kemur beint úr uppsprettum og því er aðeins lítill hluti þess úr ám. Þó renna árnar Villingavatnsá, Ölfusvatnsá og Öxará í Þingvallavatn. Úr vatninu rennur Sogið, en það er stærsta lindá á Íslandi. Þrjár fiskategundir lifa í Þingvallavatni, en þær eru: bleikja, hornsíli og urriði. Í Þingvallavatni eru fjögur afbrigði af bleikju, fleiri en fundist hafa í nokkru öðru vatni í heiminum, og allar eru þær einstakar fyrir vatnið.

Slys á vatninu

15. maí 1955

Tvítugur piltur drukknar þegar 4 ungir piltar fóru á vatnið eftir miðnætti. Þrír björguðust naumlega sem héldu sér í hvolfdan bátinn. Sá sem fórst reyndi að synda í land en honum fataðist sundið.

31. maí 1958

Ungur maður drukknar þegar bát hvolfdi. Tveir aðrir komust lífs af.

11. júlí 1966

Barn drukknaði í vatninu.

Hvítasunnudagur 1985

Þrennt drukknaði á hvítasunnudag árið 1985. Slæmt veður og öldur voru á vatninu. Fólkið var á léttbyggðum plastbát sem hefur líklega hvolft.

20. maí 2018

Bandaríkjamenn, karl og kona létust eftir að annað féll útbyrðis og hitt reyndi að bjarga því.

Ágúst 2019

Belgískur ferðamaður lést við vatnið.

Febrúar 2022

Aðalgrein: Flugslysið á Þingvallavatni 2022

Þann 3. febrúar lenti Cessna-flugvél í útsýnisflugi á vatninu. Flugmaður og 3 erlendir farþegar létust í kjölfarið en afar kalt var við og í vatninu. Í björgunaraðgerðum tóku um 1000 manns þátt.

Heimildir

• „Thingvellir.is - fiskurinn“. Sótt 4. desember 2005.
• „Þingvallavatn“. Sótt 4. desember 2005.
• „Þórisvatn“. Sótt 4. desember 2005.