Tenenbaum-fjölskyldan
Tenenbaum-fjölskyldan er bandarísk gaman-dramamynd sem kom út árið 2001. Wes Anderson leikstýrði myndinni og skrifaði handritið með Owen Wilson. Aðalleikarar í myndinni eru Danny Glover, Gene Hackman, Anjelica Huston, Bill Murray, Gwyneth Paltrow, Ben Stiller, Luke Wilson og Owen Wilson.
| Tenenbaum-fjölskyldan | |
|---|---|
| The Royal Tenenbaums | |
| Leikstjóri | Wes Anderson |
| Handritshöfundur | Wes Anderson Owen Wilson |
| Framleiðandi | Wes Anderson Barry Mendel Scott Rudin |
| Leikarar | Danny Glover Gene Hackman Anjelica Huston Bill Murray Gwyneth Paltrow Ben Stiller Luke Wilson Owen Wilson |
| Sögumaður | Alec Baldwin |
| Kvikmyndagerð | Robert Yeoman |
| Klipping | Dylan Tichenor |
| Tónlist | Mark Mothersbaugh |
| Fyrirtæki | Touchstone Pictures American Empirical Pictures |
| Dreifiaðili | Buena Vista Pictures |
| Lengd | 109 minútúr |
| Land | Bandaríkin |
| Tungumál | Enska |
| Ráðstöfunarfé | 21 milljónir USD |
| Heildartekjur | 71,4 milljónir USD |
Myndin fjallar um ævi þriggja undrabarna sem njóta mikillar velgengni á yngri árum, en lenda í vonbrigðum og misbrestum eftir að faðir þeirra yfirgefur þau á táningsaldri. Kaldhæðinn og absúrd húmor einkennir myndina.
Hackman hlaut Golden Globe-verðlaun fyrir leik sinn í myndinni. Handritið var tilnefnt til Óskarsverðlauna. Árið 2008 gerði tímaritið Empire könnun um bestu kvikmyndir allra tíma og The Royal Tenenbaums lenti þar í 159. sæti.
Söguþráður
breytaFjölskyldufaðirinn Royal Tenenbaum (Gene Hackman) útskýrir fyrir börnunum sínum þremur, Chas, Margot og Richie, að þau kona hans, Etheline (Anjelica Huston), ætli að skilja. Atriðið þróast þá í stutta útskýringu á þeirri velgengni sem hvert barn naut í æsku. Chas er snillingur í stærðfræði og viðskiptafræði, sem Royal stelur peningum frá. Margot er ættleitt barn sem fékk styrk fyrir leikrit sem hún skrifaði í níunda bekk. Richie er undrabarn í tennis og myndlistarmaður. Hann tjáir ást sína á ættleiddu systur sinni, Margot, með því að mála fjölda málverka. Royal fer með honum í skemmtiferðir en býður aldrei hinum börnunum með. Eli Cash er nágranni Tenenbaum-fjölskyldunnar og besti vinur Richies.
Tuttugu og tveimur árum síðar er Royal rekinn frá hótelinu sem hann hefur búið á. Á sama tíma eru öll Tenenbaum-börnin í tilfinningakreppu. Richie (Luke Wilson) er á ferð um heiminn um borð í skemmtiferðaskipi eftir taugaáfall. Hann skrifar Eli (Owen Wilson) bréf þar sem segir hann segir honum frá ást sinni á Margot. Chas (Ben Stiller) ofverndar syni sína, Ari og Uzi, eftir að konan hans dó í flugslysi. Margot (Gwyneth Paltrow) er gift taugalækninum Raleigh St. Clair (Bill Murray). Hún dylur fyrir honum að hún reykir. Raleigh er að gera rannsóknir á barni sem heitir Dudley Heinsbergen. Bókhaldari Etheline, Henry Sherman (Danny Glover), biður hennar.
Þegar Royal kemst að því að Etheline ætlar að giftast Henry ákveður hann að sannfæra Etheline um að hann sé með magakrabbamein til þess að endurheimta hana og börnin sín. Hann flytur aftur inn á heimili fjölskyldunnar, gistir í herbergi Richies og setur upp lækningatæki þar. Etheline býður hverju barnanna sinna heim. Royal kemst að því að Chas ofverndar börnin sín og fer með þeim út að hnupla úr búðum og horfa á hundaat. Þegar þeir koma heim húðskammar Chas hann fyrir að stofna börnunum sínum í hættu. Royal segir að Chas hafi orðið fyrir taugaáfalli.
Eli segir Margot að hann sé ástfanginn af henni eftir stutt ástarævintýri. Royal kemst að því og mótmælir því hvernig Margot fer með Raleigh, sem segir Richie frá gruni sínum um Margot í trúnaði. Raleigh og Richie ráða einkaspæjara til að njósna um hana.
Henry kannar hvort Royal sé í rauninni með krabbamein og kemst að því að spítalanum var lokað fyrir mörgum árum, að læknir hans sé svikari og að lyfin sem hann hefur tekið eru bara Tic Tac-töflur. Þá mætir Henry þjóninum, Pagoda (Kumar Pallana), og safnar fjölskyldunni saman til að segja þeim frá þessu. Eftir það yfirgefa Royal og Pagoda húsið.
Richie og Raleigh fá skýrslu um Margot frá einkaspæjaranum sem sviptir hulunni af reykingum hennar og framhjáhaldi. Eftir lestur skýrslunnar tjáir Raleigh sig eingöngu um reykingarnar en Richie tekur upplýsingunum miklu verr. Hann fer inn í baðherbergið, rakar af sér skeggið og næstum allt hárið og sker rólega á sér úlnliðina. Dudley finnur hann í blóðpolli og Raleigh flýtir sér með hann á spítala. Skömmu síðar, meðan Tenenbaum-fjölskyldan bíður í biðsalnum, horfist Raleigh í augu við Margot og fer burt. Seinna kemst Richie á undan frá spítalanum og hittir Margot. Þau segja hvert öðru frá ást sinni og kyssast.
Royal ákveður að hann vilji að Etheline sé ánægð og undirbýr skilnaðinn. Áður en Henry og Etheline giftast ekur Eli bílnum sínum á húsið því hann er á meskalíni. Hann ekur næstum á Ari og Uzi en Royal bjargar þeim á síðustu stundu. Chas verður öskureiður og eltist við Eli um húsið. Þegar hann nær Eli byrja þeir að slást. Eli gerir sér ljóst að hann þarfnast hjálpar en Chas samþykkir að hann þarfnist líka hjálpar. Chas þakkar Royal fyrir að bjarga sonum sínum. Fjörutíu og átta tímum síðar giftast Etheline og Harry hjá borgardómara.
Tíminn líður og Margot gefur út nýtt leikrit byggt á fjölskyldunni sinni, Raleigh gefur út bók um ástand Dudleys, Eli fer í meðferð í Norður-Dakóta og Richie stofna tennisskóla fyrir unglinga. Royal verður fyrir hjartaáfalli og deyr, sem Chas er einn vitni að. Fjölskyldan fer í jarðarför hans og fer öll heim saman eftir útförina. Á legsteini Royals stendur að hann „dó við að bjarga fjölskyldunni sinni úr sökkvandi flaki orrustuskips“.