Kristín Rós Hákonardóttir
Kristín Rós Hákonardóttir (f. 18. júlí 1973) er íslenskur kennari og afrekskona í sundi. Kristín Rós er ein mesta afrekskona íslenskra íþrótta en hún var afar sigursæl á sundferli sínum og vann til fjölda gullverðlauna á Olympíumótum fatlaðra.
Hún fæddist í Reykjavík og ólst upp í Breiðholti. Foreldrar hennar eru Hákon Magnússon (f. 1933) skipstjóri og Rósa Sigurðardóttir (f. 1941) húsmóðir. Kristín Rós á tvö börn fædd 2010 og 2012.
Kristín Rós lauk stúdentsprófi frá Fjölbrautaskólanum í Breiðholti árið 1995, BA-gráðu í grafískri hönnun frá Listaháskóla Íslands árið 2002 og kennsluréttindanámi frá sama skóla árið 2004. Hún hefur starfað sem grunnskólakennari, sundþjálfari og verið kennari á sundnámskeiðum.[1]
Sundferill hennar hófst þegar hún var sjö ára gömul er hún byrjaði að æfa sund þrisvar í viku hjá Íþróttafélagi fatlaðra. Hún keppti á fimm heimsmeistaramótum og fimm Ólympíumótum og setti samtals sextíu heimsmet og níu Ólympíumótsmet.[2] Hún vann til 12 ólympíuverðlauna, þar af 5 gull, 2 silfur og 5 brons.[1]
Kristín Rós hefur hlotið fjölmargar viðurkenningar fyrir sundafrek sín, m.a. var hún valin íþróttamaður ársins hjá Íþróttasambandi fatlaðra tólf ár í röð, fyrst árið 1995 og síðast árið 2006, er hún lauk keppnisferli sínum. Hún hlaut viðurkenningu frá Eurosport árið 2004 fyrir framúrskarandi árangur og var fyrsti íslenski íþróttamaðurinn til að hljóta þá viðurkenningu og einnig fyrsti íþróttamaður í heimi úr röðum fatlaðra.[2] Hún var sæmd riddarakrossi Hinnar íslensku fálkaorðu árið 2008 og var útnefnd í Heiðurshöll ÍSÍ árið 2013.[2]
Tilvísanir breyta
- ↑ 1,0 1,1 „Er ánægð með sundferilinn í heild sinni“, Morgunblaðið, 18. júlí 2013 (skoðað 16. desember 2020)
- ↑ 2,0 2,1 2,2 Isi.is, „Kristín Rós Hákonardóttir“ (skoðað 17. desember 2020)