Jarðskjálftinn í Tyrklandi og Sýrlandi 2023
37°10′26″N 37°01′55″A / 37.174°N 37.032°A
| Jarðskjálftinn í Tyrklandi og Sýrlandi 2023 | |
|---|---|
 Svipmyndir af eftirmálum jarðskjálftanna. | |
| Dagsetning | 6. febrúar 2023, 01:17:35 |
| Stærð | 7,8 Mw |
| Dýpt | 17,9km |
| Áhrifasvæði skjálftans | Tyrkland og Sýrland |
| Mannsföll | Meira en 59.000 látnir og meira en 120.000 slasaðir. |
Aðfaranóttina 6. febrúar árið 2023 reið jarðskjálfti yfir suðurhluta Tyrklands sem olli gríðarlegum skemmdum og leiddi til margra þúsunda dauðsfalla. Skjálftarnir voru þeir stærstu sem hafa mælst í Tyrklandi frá árinu 1939 (Erzincan-jarðskjálftinn).[1]
Jarðskjálftinn var 7,8 að stærð og átti upptök sín um 30 kílómetra frá borginni Gaziantep, nálægt landamærunum við Sýrland. Skjálftinn fannst einnig lengra inni í Sýrlandi og í Líbanon, um 500 kílómetrum frá upptökum hans. Eftirskjálftar fylgdu í kjölfar fyrsta skjálftans. Sá stærsti fannst um tólf klukkustundum eftir þann fyrsta og var um 7,7 að að stærð.[2]
Skjálftarnir ollu mikilli eyðileggingu. Daginn eftir fyrsta skjálftann hafði Alþjóðaheilbrigðismálastofnuninni talist svo til að meira en 5.000 manns hefðu látist í Tyrklandi og Sýrlandi vegna skjálftanna. Búist var við því að enn fleiri, tugþúsundir hefðu látist. Björgunarstarf hófst til að ná fólki úr húsarústum á dögunum eftir skjálftana. Þúsundir byggingar höfðu hrunið í borgum og bæjum við landamæri Sýrlands og Tyrklands og alls er talið að 23 milljónir manns hafi orðið fyrir beinum áhrifum af skjálftanum.[3]
Recep Tayyip Erdoğan Tyrklandsforseti lýsti yfir sjö daga þjóðarsorg vegna skjálftanna.[4] Alþjóðaheilbrigðismálastofnunin virkjaði neyðaráætlun og sendi sveitir til að aðstoða tyrknesk stjórnvöld að sinna heilsugæslu fyrir slasaða. Flóttamannastofnun Sameinuðu þjóðanna vann að því að samræma viðbrögð stofnana Sameinuðu þjóðanna og annara mannúðarsamtaka við að aðstoða fólk í Sýrlandi sem varð fyrir áhrifum af skjálftunum. Fjöldi fólks býr í flóttamannabúðum í norðurhluta Sýrlands vegna yfirstandandi átaka þar.[5]
Viðbrögð SÞ sættu gagnrýni um óþarfa seinagang. [6]
Ýmis lönd sendu aðstoð til Tyrklands til að hjálpa til við björgun og hjúkrun í kjölfar skjálftanna. Meðal annars sendi Ísland sérfræðinga frá Landsbjörgu til að létta undir með hjálparsveitunum.[7]
Tilvísanir
breyta- ↑ „Mikil eyðilegging í Tyrklandi og Sýrlandi eftir jarðskjálfta“. UN Women. 6. febrúar 2023. Sótt 7. febrúar 2023.
- ↑ Ísak Gabríel Regal (7. febrúar 2023). „Yfir fimm þúsund látin í Tyrklandi og Sýrlandi“. RÚV. Sótt 7. febrúar 2023.
- ↑ „Enn skelfur jörð í Tyrklandi“. mbl.is. 7. febrúar 2023. Sótt 7. febrúar 2023.
- ↑ Samúel Karl Ólason (6. febrúar 2023). „Hvert húsið hrundi á eftir öðru“. Vísir. Sótt 7. febrúar 2023.
- ↑ „Sameinuðu þjóðirnar koma bágstöddum til hjálpar á jarðskjálftasvæðum“. Upplýsingaskrifstofa Sameinuðu þjóðanna fyrir Vestur-Evrópu. 7. febrúar 2023. Sótt 7. febrúar 2023.
- ↑ BBC News - Syria Earthquake: Why did the UN aid take so long to arrive? BBC, sótt 7/3 2023
- ↑ „Sérfræðingar Landsbjargar til Tyrklands“. mbl.is. 7. febrúar 2023. Sótt 7. febrúar 2023.