Honorius (keisari)
Flavius Honorius (9. september 384 – 15. ágúst 423) var keisari Vestrómverska ríkisins frá 393 – 423.
| Honorius | |
| Vestrómverskur keisari | |
 | |
| Valdatími | 393 – 423 með Constantiusi 3. (421) |
|---|---|
|
Fæddur: |
9. september 384 |
| Fæðingarstaður | Konstantínópel |
|
Dáinn: |
15. ágúst 423 |
| Dánarstaður | Ravenna |
| Forveri | Theodosius 1. (yfir öllu Rómaveldi) |
| Eftirmaður | Joannes |
| Maki/makar | Maria Thermantia |
| Faðir | Theodosius 1. |
| Móðir | Aelia Flaccilla |
| Fæðingarnafn | Flavius Honorius |
| Keisaranafn | Flavius Honorius Augustus |
| Ætt | Theodosíska ættin |
Honorius var sonur Theodosiusar 1. keisara sem var síðasti keisarinn yfir öllu Rómaveldi. Þegar Theodosius lést, árið 395, var ríkinu skipt milli Honoriusar, sem varð keisari yfir vesturhlutanum, og bróður hans Arcadiusar, sem varð keisari yfir austurhlutanum. Ríkinu hafði nokkrum sinnum áður verið skipt í austur og vestur en þar sem skiptingin varð varanleg í þetta skiptið er oft miðað við að Vestrómverkska ríkið og Austrómverska ríkið hafi orðið til við hana.
Honorius var aðeins tíu ára þegar faðir hans lést og var ríkinu því upphaflega stjórnað af aðstoðarmönnum hans og var Stilicho mikilvægastur þeirra. Stilicho, sem var hálfur Vandali og hálfur Rómverji, var einn hæfasti hershöfðingi síns tíma og vann marga sigra gegn Germönum. Að lokum féll hann þó í ónáð, var handtekinn og tekinn af lífi, árið 408. Stöðug hnignun ríkisins einkenndi keisaratíð Honoriusar og til marks um það var sjálf Rómaborg hertekin, árið 410, af Gotneskum her undir stjórn Alarics. Gotneski herinn eyddi þremur dögum í að ræna öllum þeim verðmætum sem þeir gátu í borginni áður en þeir yfirgáfu hana aftur og héldu suður Ítalíuskagann þar sem þeir héldu áfram að valda tjóni. Róm hafði ekki verið hertekin af utanaðkomandi her síðan Gallar hertóku hana árið 387 f.Kr. og var þessi atburður mikið áfall fyrir íbúa borgarinnar og alls heimsveldisins. Sjálfur var Honorius með hirð sína í Ravenna, sem nú var höfuðborg ríkisins.
Á valdatíma Honoriusar var Bretland yfirgefið af Rómverjum fyrir fullt og allt. Árið 421 skipaði Honorius hershöfðingjann Constantius sem með-keisara sinn. Constantius var giftur systur Honoriusar, Galla Placidia, og áttu þau soninn Valentinianus sem síðar varð keisari. Constantius lést eftir aðeins nokkra mánuði á valdastóli. Honorius lést svo árið 423 án erfingja og var embættismaðurinn Joannes þá skipaður keisari Vestrómverska ríkisins. Joannes var þó ekki viðurkenndur af austrómverska keisaranum Theodosiusi 2. sem skipaði systurson Honoriusar, Valentinianus 3., sem keisara, árið eftir.
| Fyrirrennari: Theodosius 1. |
|
Eftirmaður: Joannes | |||