Bart McGhee

Bartholomew „Bertie“ eða „Bart“ McGhee (f. 30. apríl 1899 - d. 26. janúar 1979) var knattspyrnumaður frá Bandaríkjunum. Hann var í bandaríska landsliðinu sem hlaut bronsverðlaunin á HM 1930.

Ævi og ferill

McGhee fæddist í Edinborg í Skotlandi, sonur James McGhee sem leikið hafði knattspyrnu með Hibernian F.C. og skoska landsliðinu og þjálfað hitt Edinborgarliðið Heart of Midlothian F.C.. Eftir að störfum hans fyrir Hearts-liðið lauk ákvað McGhee-fjölskyldan að flytja búferlum til Bandaríkjanna til að skapa sér nýtt líf.

Bart fylgdi í fótspor föður síns og æfði knattspyrnu, fyrst sem áhugamaður frá 1917-22 en því næst sem atvinnumaður. Frá 1922 til 1931 lék hann fyrir nokkur félög í New York og Fíladelfíu. Heimskreppan lék atvinnumannadeildina í Bandaríkjunum grátt og virðist McGhee hafa lagt skóna á hilluna árið 1931.

Kunnastur er hann fyrir þátttöku sína í HM í Úrúgvæ 1930. Leikirnir þrír sem Bandaríkin spiluðu á mótinu voru jafnframt einu landsleikir McGhee. Hann skoraði fyrsta mark síns liðs í 3:0 sigri á Belgum í fyrsta leik. Viðureignin fór fram á sama tíma og leikur Frakklands og Mexíkó. Þar sem nákvæmur upphafstími beggja leikjanna er ekki fyllilega þekktur var lengi talið að McGhee hefði skorað fyrsta mark HM-sögunnar en í seinni tíð er almennt álitið að Frakkinn Lucien Laurent eigi heiðurinn að því.

Bart McGhee lést í Fíladelfíu árið 1979. Sjö árum eftir dauða sinn var hann tekinn inn í frægðarhöll bandarísku knattspyrnunnar.

Heimildir

• Fyrirmynd greinarinnar var „Bart McGhee“ á ensku útgáfu Wikipedia. Sótt 6. ágúst 2023.