Alexander Pope
Alexander Pope (21. maí 1688 — 30. maí 1744) var enskt skáld sem er einkum þekktur fyrir ádeilukvæði og Hómersþýðingar sínar. Hann var þekktasta skáld sinnar tíðar og er enn með frægustu skáldum á enska tungu. Meðal kunnustu verka hans eru An Essay on Criticism frá 1711 sem hóf ensku tvíhenduna til vinsælda, háðsádeilan The Dunciad og heimspekilega kvæðið An Essay on Man sem Jón Þorláksson sneri á íslensku sem Tilraun um manninn.
Pope var úr kaþólskri fjölskyldu og gekk í kaþólskan skóla þótt slíkir skólar væru þá formlega bannaðir. Meðal almennings í Englandi var þá ríkjandi mikil andúð á kaþólskum og fjölskylda hans þurfti að flytja til Berkshire þegar hann var tólf ára vegna laga sem bönnuðu kaþólikkum að búa innan 10 mílna geisla frá London eða Westminster. Um sama leyti fékk hann berkla sem ollu afmyndun beina. Vegna sjúkdómsins náði hann aðeins 1,37 metra hæð. Berklarnir ollu líka öndunarerfiðleikum og verkjum sem Pope þjáðist af alla ævi.
Tenglar
breyta