Sundahöfn
Sundahöfn er flutningahöfn Reykjavíkur og nær frá Laugarnesi við Vatnagarða að botni Elliðavogs. Hún skiptist í nokkra bakka þar sem meðal annars eru athafnasvæði skipafélaganna Eimskips og Samskipa, en auk þeirra er mikil önnur starfsemi. Þar leggja líka að þau skemmtiferðaskip sem eru of stór fyrir Gömlu höfnina.
1960 var hafist handa við að byggja Sundahöfn og fyrsti áfanginn var tekinn í notkun 1968. Við þetta fluttust allir vöruflutningar smám saman úr gömlu höfninni.
Til stóð að flytja flutningsaðstöðuna til Geldinganess og hófust framkvæmdir þar 2001 en var hætt þegar þær mættu mikilli andstöðu þeirra sem töldu Geldinganes henta betur til íbúðabyggðar. Síðan þá hafa komið fram hugmyndir um að efla Grundartangahöfn í Hvalfirði þannig að flutningsaðstaðan geti flust þangað.