Opna aðalvalmynd

Sigrún Þuríður Geirsdóttir (fædd 3. júlí 1972) er fyrsta íslenska konan til að synda ein yfir Ermarsundið og fyrsta konan til að synda svokallað Eyjasund en það er sundið milli Vestmannaeyja og Landeyjasands.

Sigrún Þuríður Geirsdóttir
Sigrún Þuríður Geirsdóttir
Fædd 3. júlí 1972 (1972-07-03) (47 ára)
Mosfellsbær, Íslandi
Þekkt fyrir Að vera fyrsta íslenska konan til að synda yfir Ermarsundið og fyrsta konan til að synda Eyjasundið
Maki Jóhannes Jónsson
Börn 3
Foreldrar Geir Þorsteinsson, Emma Ottósdóttir
Heimasíða facebook.com/sigrung

Auk þess að synda ein yfir Ermarsundið hefur Sigrún synt þrisvar sinnum yfir Ermarsundið í boðsundi. Sigrún hefur synt mörg sjósund við Ísland, líkt og Viðeyjarsund hið stærra (frá Bryggjunni í Viðey og inn í Reykjavíkurhöfn), Viðeyjarsund hið minna (frá Skarfakletti að bryggjunni í Viðey og aftur til baka), Drangeyjarsund, Bessastaðasund, Skarfavararsund, Ægisíðusund, Fossvogssund, Grímseyjarsund, Helgusund og Eyjasund auk þess sem hún synti boðsund frá Ánanaustum upp á Akranes.

Gæsalappir

Það skiptir ekki máli hvað þú ert lengi, heldur að taka þátt, hafa gaman og komast í mark“

— Sigrún Þuríður Geirsdóttir.

Ævi og menntunBreyta

Sigrún er næstyngst fjögurra systkina og ólst upp í Mosfellsbæ. Hún giftist Jóhannesi Jónssyni árið 1992 og eiga þau þrjú börn.

Sigrún er menntaður þroskaþjálfi en hún útskrifaðist frá Háskóla Íslands árið 2001 og með meistarapróf í þroskaþjálfafræðum árið 2016 frá sama skóla.

Ermarsund SigrúnarBreyta

Árið 2015 synti Sigrún fyrst íslenskra kvenna yfir Ermarsundið en áður hafði hún synt þrisvar sinnum boðsund yfir Ermarsundið.

AðdragandinnBreyta

Árið 2012 fengu nokkrar sjósundskonur þá hugmynd að það væri gaman að synda boðsund yfir Ermarsundið. Úr varð að stofnuð var boðsundssveitin Sækýrnar, sem var skipuð sex konum. Sækýrnar náðu að synda yfir Ermarsundið þann 26. júní 2013. Tími þeirra var 19 klst. og 32 mín. Sundsveiti hlaut sérstök verðlaun frá The Channel Swimming & Piloting Federation fyrir lengsta boðsund ársins,[1] en það þarf mikla þrautsegju til að gefast ekki upp.

Sigrún synti aftur boðsund yfir Ermarsund árið 2014, þá með fimm manna boðsundssveit sem kallaði sig Yfirliðið[2] og var einnig eingöngu skipuð konum. Yfirliðið náði að synda yfir Ermarsundið þann 20. júlí 2014. Tími þeirra var 13 klst. og 31 mín.

 
Sigrún Þuríður Geirsdóttir

Eftir sundið með Yfirliðinu fann Sigrún að hana langaði að prófa að synda ein yfir Ermarsundið.

Ermarsundið sjálftBreyta

Ermarsundið er stundum kallað „Everest-fjall sjósundmanna“. Að synda yfir sundið er eitt og sér mikið afrek, en þrekvirki Sigrúnar verður líklega seint leikið eftir. Sundið tók hana 22 klukkustundir og 34 mínútur. Að synda allan þennan tíma í sjó er ótrúlegt afrek, sérstaklega þegar haft er í huga að hún hefur engan bakgrunn sem íþróttamaður og að hún lærði skriðsund árið 2012, einungis þremur árum fyrir Ermarsundið.

 
Sigrún að synda yfir Ermarsundið

Vegalengdin sem Sigrún synti var 62,7 kílómetrar en það samsvarar 1.254 ferðum fram og til baka í 25 metra sundlaug, og það í gríðarlega miklum straumum, öldum og að hluta til í svarta myrkri. Eftir ríflega þriggja klukkustunda sund varð Sigrún sjóveik og kastaði hún upp hverri einustu matargjöf á 30 mínútna fresti í tæpar sjö klukkustundir. Þegar hún kastaði upp þurfti hún að troða marvaðann í gríðarlega sterkum straumum og rak hana þá töluvert af leið, og það þurfti hún að vinna upp í hvert skipti. Í næstum því sjö klukkustundir fékk hún matargjöf, kastaði henni upp og hélt svo áfram að synda. Þar sem hún fékk enga næringu fór orkuleysið að segja til sín og hægði töluvert á sundi hennar. Þegar um tíu klukkustundur voru liðnar af sundinu tókst henni loks að vinna bug á sjóveikinni og halda fæðunni niðri, en þá var skipt um fæði. Það sem eftir lifði sunds var fæða hennar Coca Cola, Milky Way súkkulaði og Jelly Babies. Þá voru meira en 12 klukkustundir eftir af sundi hennar.

Eftir um 17 klukkustunda sund kom Sigrún að "Grafreit draumanna" (The Graveyard of Dreams") en það kallast síðustu mílurnar við strendur Frakklands. Hér eru öfl sjávarfallanna gríðarleg, en þau bæði ýta og toga í sundmanninn þannig að hann þarf að berjast til að halda áfram. Þreyttur sundmaður getur lent í því að synda hér í langan tíma án þess að færast nær landi. Sundmenn einfaldlega "festast" og örmagnast af þreytu. Þrátt fyrir að hér sé stutt í land reynist þetta sundmönnum oft það erfitt að þeir verða að hætta sundi. Má hér sem dæmi nefna frænda Sigrúnar, sundkappann Eyjólf Jónsson, þegar hann reyndi við Ermarsundið árið 1958, og Benedikt Hjartarson þegar hann varð frá að hverfa árið 2007 eftir meira en 15 klukkustunda sund.

Sigrún gafst aldrei upp og þegar hún nam land í Frakklandi við Cap Gris Nez hafði hún tekið um 62 þúsund sundtök og brennt meira en 22 þúsund kaloríum.

 
Sundleið Sigrúnar yfir Ermarsundið

Í mars 2016 var Sigrún sæmd verðlaunum fyrir sundið sitt af The Channel Swimming & Piloting Federation.[3] Verðlaunin voru veitt fyrir aðdáunarverðasta sund ársins 2015[4] og eru kennd við Gertrude Ederle(en), fyrstu konunnar til að synda yfir Ermarsundið.

Sigrún var tilnefnd sem maður ársins árið 2015 bæði hjá Vísi og Bylgjunni[5] og einnig á Rás 2.[6] Hún var síðan valin Mosfellingur ársins 2015.[7]

Árið 2019 synti Sigrún enn einu sinni boðsund yfir Ermarsundið nú með sundhópnum Marglyttunum[8]. Markmiðið með boðsundinu var að vekja athygli á áhrifum plastmengunar á lífríki sjávar og að safna áheitum fyrir umhverfisverndarsamtökin Bláa herinn.[9]

 
Sigrún Þuríður og forseti Íslands, hr. Guðni Th. Jóhannesson

TilvísanirBreyta

  1. „Channel Swimming & Piloting Federation - CS&PF Awards“. Channel Swimming and Piloting Federation. Sótt 29. júlí 2019.
  2. „Yfirliðið synti yfir Ermarsundið - Vísir“. visir.is. Sótt 29. júlí 2019.
  3. „Sigrún verðlaunuð fyrir sundið yfir Ermarsund - Vísir“. visir.is. Sótt 29. júlí 2019.
  4. „Channel Swimming & Piloting Federation - CS&PF Awards“. Channel Swimming and Piloting Federation. Sótt 29. júlí 2019.
  5. „Þau eru tilnefnd sem Maður ársins 2015 - Vísir“. visir.is. Sótt 29. júlí 2019.
  6. „Kosning: Maður ársins 2015“. RÚV (enska). 28. desember 2015. Sótt 29. júlí 2019.
  7. „Sigrún Mosfellingur ársins 2015“. www.mbl.is. Sótt 29. júlí 2019.
  8. „Marglyttunum tókst ætlunarverkið“. www.mbl.is. Sótt 11. september 2019.
  9. „Synda yfir Ermar­sundið til að vekja at­hygli á á­hrifum plast­­mengunar á líf­­ríki sjávar - Vísir“. visir.is. Sótt 10. september 2019.