Maraþonhlaup

Maraþon vísar hingað. Fyrir bæinn, sjá Maraþon (bær).

Maraþonhlaup, eða bara maraþon er langhlaup að staðlaðri lengd kennt við borgina Maraþon á Grikklandi. Maraþonhlaup er 42,195 km langt og er það vegalengdin sem boðberi nokkur er sagður hafa hlaupið með skilaboð um sigur í bardaganum við Maraþon frá þeirri borg til Aþenu. Sagan segir að hann hafi ekkert stansað á leiðinni og hafi látist um leið og hann skilaði af sér boðunum.[1] Maraþon eru oft hlaupin um borgir og taka oft mjög margir þátt í hverju hlaupi. Þá eru oft hlaupin með til dæmis hálfmaraþon, þar sem hlaupinn er 21,1 km auk þess sem stundum er fjórðungur vegalengdarinnar hlaupinn. Meðal frægustu maraþonhlaupa heims eru þau sem fram fara í New York, London og Chicago.

Á Íslandi fara árlega fram fjögur maraþonhlaup. Félag maraþonhlaupara stendur fyrir tveimur hlaupum, öðru í mars (marsþon) og hinu í október (haustþon). Mývatnsmaraþon hefur verið þreytt síðan 1995 og Reykjavíkurmaraþon síðan 1989. Íslandsmet í maraþonhlaupi á Kári Steinn Karlsson, 2:17,12, sett 25. september 2011 í Berlín. Gildandi heimsmet er 2:01:39 og heldur það Eliud Kipchoge frá Kenía. Hann heldur ennfremur annað heimsmet sem var tekið gilt af heimsmetabók Guinnes en ekki alþjóðaíþróttasambandinu nefnilega fyrsta hlaupið undir tveggja tíma múrnum, þar sem það hlaup var ekki háð í stöðluðu keppnisfyrirkomulagi, hann hljóp einn og naut ímissra þæginda eins og bíl sem ók fyrir framan hann mest alla leiðina til að minka vindmótstöðu, hlaut það ekki náð sem almennt keppnismet.

Magnús Guðbjörnsson hljóp maraþonhlaup fyrstur Íslendinga árið 1926. Hann hljóp þá frá Kambabrún vestur á Íþróttavöllinn í Reykjavík á 3:15,15. Ekki var þó um nákvæmlega mælda vegalengd að ræða, heldur var hlaupið áætlað rétt rúmur 41 km.

Félag maraþonhlaupara heldur utan um árangur allra Íslendinga sem hlaupið hafa maraþon í löglegri keppni.

TilvísanirBreyta

  1. Geir Þ. Þórarinsson. „Hversu langt var fyrsta maraþonhlaupið og hversu öruggar heimildir eru um að það hafi raunverulega verið hlaupið á meðal Forngrikkja?“. Vísindavefurinn 2.12.2010. http://visindavefur.is/?id=57327. (Skoðað 2.12.2010).

TenglarBreyta