Leiðtogafundur Evrópuráðsins 2023

Fundur Evrópuráðsins árið 2023 var haldinn í Reykjavík dagana 16.-17. maí í Hörpu. Helstu leiðtogar Evrópu mættu á fundinn og var öryggisgæsla sú mesta sem hefur verið á Íslandi. Miðborgin var lokuð fyrir bílaumferð og umhverfi nálæg Hörpu var lokað og voru menn þar vopnum búnir.

Um 40 leiðtogar Evrópuríkja komu á fundinn, þar á meðal Emmanuel Macron, forseti Frakklands, Rishi Sunak, forsætisráðherra Bretlands, Olaf Scholz, kanslari Þýskalands og Denys Sjmyhal, forsætisráðherra Úkraínu.

Fundurinn snerist að miklu leyti um stríð Rússa og Úkraínu og að Rússar yrðu látnir sæta ábyrgð fyrir tjón sem þeir hafa valdið. Viljayfirlýsing var rituð um að koma á sérstökum stríðsglæpadómstól og tjónaskýrslu vegna innrásarinnar. Fulltrúar sex aðildarríkja að Evrópuráðinu, Serbía, Armenía, Aserbaísjan, Tyrkland, Bosnía og Hersegóvína og Ungverjaland, skrifuðu þó ekki undir yfirlýsinguna um tjónaskýrsluna.

Helstu niðurstöður fundarins voru: Yfirlýsing um stuðning við Úkraínu, lýðræðisleg gildi (Reykjavík Principle for Democracy), efling vinnu Evrópuráðsins á sviði umhverfismála og mikilvægi þess að aðildarríki Evrópuráðsins virði niðurstöður dóma Mannréttindadómstólsins.