Jamestown (skip)
Jamestown var bandarískt draugaskip sem strandaði 26. júní 1881 á milli Hestakletts og Þórshafnar í Rosmhvalaneshreppi (sem síðar hét Miðneshreppur) á Suðurnesjum. Það var um fjögur þúsund tonn og að líkindum meðal stærstu skipa sem komið höfðu til Íslands á þeim tíma.
Skipið var að flytja verðmætan timburfarm frá Bandaríkjunum til Liverpool á Englandi þegar það lenti í aftakaveðri undan vesturströnd Írlands. Í óveðrinu skemmdist það mikið og var skipverjum bjargað um borð í annað skip, Ethiopia. Þeir voru síðan settir á land í Glasgow í Skotlandi. Jamestown rak aftur á móti stjórnlaust um Norður-Atlantshafið í nokkrar vikur þar til það strandaði við Ísland.
Skipið þótti mikill happafengur á Íslandi enda átti fólk erfitt með að verða sér úti um timbur á þeim tíma. Voru plankarnir notaðir í brúargerð og húsagerð. Enn stendur að minnsta kosti eitt hús sem smíðað er úr viði úr Jamestown, húsið Efra Sandgerði, heimili Lionsklúbbsins í Sandgerði. Einnig var „gamla“ húsið að Krókskoti í Sandgerði byggt úr Jamestown-timbri. Timbrið úr því húsi var síðan notað í „nýja“ húsið að Krókskoti sem stendur enn.
Árið 2002 fannst annað akkeri skipsins undan Höfnum, og 24. júní 2008 var það híft upp af meðlimum umhverfisverndarsamtakanna Blái herinn. Því var komið fyrir við húsið Efra Sandgerði. Áður hafði hitt akkerið fundist, en það stendur fyrir utan kirkjuna í Höfnum.
Heimildir
breyta- „Vefsíða Leós: Frásagnir: Jamestown“. Afrit af upprunalegu geymt þann 5 júlí 2008.