Hebei

Hebei (kínverska: 河北; rómönskun: Héběi) er strandhérað í norðurhluta Alþýðulýðveldisins Kína, staðsett við Bóhaíhaf sem er flói innst í Gula hafinu. Héraðið nær yfir 78.200 ferkílómetra landsvæði. Það afmarkast í norðvestri af sjálfstjórnarsvæðinu Innri Mongólíu og héruðunum Liaoning í norðaustri, Shandong í suðaustri, Henan í suðri og Shanxi í vestri.

Kort af legu Hebei héraðs í norðurhluta Kína.

Lítill hluti Hebei, Sanhe og Xianghe-sýslur, er ótengdur hinum landshlutanum héraðsins, og myndar fleyg á milli sveitarfélaganna Beijing og Tianjin. Bæði sveitarfélög Beijing og Tianjin, sem liggja að hvort öðru, voru skorin út úr Hebei héraði.

Nafnið Hebei þýðir bókstaflega „norður af fljótinu“, og vísar til staðsetningar þess norðan við hið mikla Gulafljót.

Höfuðborgin og stærsta borg héraðsins er Shijiazhuang. Hún liggur um 280 km suðvestur af Beijing borg. Höfuðborgin liggur á mótum þriggja járnbrauta: Beijing-Guangzhou (Canton) línunnar, Norður-suður stofnbrautarinnar og járnbrautalínanna til Shanxi og til Shandong.

Menningarlega og efnahagslega er Hebei eitt þróaðasta hérað í Norður-Kína.

Íbúafjöldi Hebei er yfir 74 milljónir. Flestir eru Han Kínverjar eða um 96 prósent íbúa. Aðrir teljast til þjóðabrota í minnihluta á borð við Manchu, Hui og Mongólar.

Hebei hérað er ríkt af náttúrulegum afurðum, svo sem korni, bómull og ávöxtum. Það var einnig eitt af fyrstu héruðunum Kína til að iðnvæðast. Mikil stálframleiðsla Hebei hefur haft í för með sér alvarlega loftmengun.

Myndir

• 
  Hluti af Kínamúrnum í Jinshanling.
• 
  Graslendur Fengning sýslu.
• 
  Putuo Zongcheng hofið í Chengde, Hebei héraði, reist árið 1771 á valdatíma Qianlong keisara.
• 
  Lingxiao-pagóðan í Zhengding, Hebei héraði, var byggð árið 1045 e.Kr. á valdatíma Song-ættarinnar.
• 
  Keisarahallir og -garðar Chengde, í Hebei héraði, er talin til þjóðargersema Kína og á minjalista UNESCO.
• 
  Frá borginni Handan vestur af fjallasvæði Qi Bu Gou.

Tenglar

• Vefsíða Britannica um Hebei. Inniheldur ýmsar upplýsingar um héraðið t.d. sögu, landslag, skipulag og markverða staði]
• Enskur vefur héraðsstjórnar Hebei. Geymt 12 mars 2021 í Wayback Machine Inniheldur ýmsar upplýsingar t.d. um sögu, skipulag, fréttir og ferðaþjónustu

Heimildir

• Fyrirmynd greinarinnar var „Hebei“ á ensku útgáfu Wikipedia. Sótt 12. janúar 2021.