Gunnlaugur Leifsson

Gunnlaugur Leifsson (d. 1218 eða 1219) var íslenskur rithöfundur og skáld. Hann var munkur í Þingeyraklaustri, en þar var klaustur af Benediktsreglu.

Gunnlaugur samdi sögu Ólafs Tryggvasonar á latínu. Hún er nú glötuð, en talið að hún hafi verið talsvert aukin útgáfa af hinni latnesku Ólafs sögu Tryggvasonar eftir Odd Snorrason, klausturbróður hans á Þingeyrum. Snorri Sturluson studdist að hluta við sögu Gunnlaugs þegar hann vann að Heimskringlu. Kaflar úr verki Gunnlaugs voru teknir upp í Ólafs sögu Tryggvasonar hina mestu, sjá Simpson 2004:166.

Gunnlaugur samdi á latínu sögu Jóns Ögmundssonar hins helga, Hólabiskups. Þetta verk er glatað, en til eru íslenskar þýðingar á sögu Jóns.

Talið er að Gunnlaugur hafi skrifað þátt á latínu um Þorvald víðförla, en hann er aðeins varðveittur í íslenskri þýðingu.

Gunnlaugur mun hafa tekið þátt í að safna til jarteiknabókar Þorláks helga.

Vitað er að Gunnlaugur skrifaði um Ambrósíus kirkjuföður. Nýlegar rannsóknir benda til að Ambrósíus saga, sem er íslensk þýðing á Vita sancti Ambrosii, geti verið verk Gunnlaugs. (Katrín Axelsdóttir 2005:349).

Loks samdi Gunnlaugur Merlínusspá, sem er íslensk þýðing á Prophetiae Merlini eftir Geoffrey frá Monmouth. Myndmálið í þýðingu Gunnlaugs sýnir að hann hafði góða þekkingu á íslenskri skáldskaparlist. Kvæðið er varðveitt í Hauksbók, það skiptist í tvo hluta og er alls 171 erindi, undir fornyrðislagi.

Heimildir

• Eysteinn Björnsson (2002). Index of Old Norse/Icelandic Skaldic Poetry. Gefið út á netinu: http://www.hi.is/~eybjorn/ugm/skindex/skindex.html Geymt 23 september 2006 í Wayback Machine
• Merlínusspá, sjá http://www.hi.is/~eybjorn/ugm/skindex/gleifs.html Geymt 11 mars 2007 í Wayback Machine Úr útgáfum Finns Jónssonar og Ernst A. Kock.
• Guðrún Nordal (2001). Tools of Literacy : The Role of Skaldic Verse in Icelandic Textual Culture of the Twelfth and Thirteenth Centuries. University of Toronto Press. Bls. 168-169.
• Katrín Axelsdóttir (2005). "Gunnlaugur Leifsson og Ambrósíus saga". Skírnir, Haust 2005:337-349. ISSN 0256-8446
• Theodore M. Andersson (þýð.). (2003). Oddr Snorrason: The Saga of Olaf Tryggvason. Cornell University Press. ISBN 0-8014-4149-8
• Simpson, Jacqueline (2004). "Olaf Tryggvason versus the Powers of Darkness" í The Witch Figure, bls. 165-187. Routledge. ISBN 0-415-33074-2
• Fyrirmynd greinarinnar var „Gunnlaugr Leifsson“ á ensku útgáfu Wikipedia. Sótt 25. apríl 2008.

Tenglar

• Þorvalds þáttur víðförla
• Brot á latínu um Þorlák helga Geymt 26 apríl 2012 í Wayback Machine
• Jóns saga hins helga eftir Gunnlaug munk Geymt 26 apríl 2012 í Wayback Machine
• Ambrosius saga byskups Geymt 11 janúar 2013 í Archive.today (myndir)
• Ambrosius saga byskups Geymt 11 júní 2007 í Wayback Machine (texti)