Nuuk

Nuuk (danska Godthåb, stundum nefndur Góðvon á íslensku). Nuuk er hluti af sveitarfélaginu Sermersooq og íbúafjöldi er um 19.872 (2024) eða um þriðjungur íbúa Grænlands. Heimastjórn Grænlands, þing og háskóli hafa aðsetur í Nuuk. Hið opinbera nafn bæjarins, Nuuk þýðir „tangi“ á grænlensku. Nafnið varð opinbert þegar Grænland fékk heimastjórn árið 1979.

Nuussuaq-hverfið í Nuuk, fjallið Sermitsiaq (1.210 m.) í bakgrunni

Nuuk-kort ( OpenStreetMap)

Nuuk stendur við Nuup Kangerlua-fjörð á suðvesturströnd Grænlands, á tanga þar sem tveir djúpir firðir skerast inn í landið. Má segja að bærinn skiptist í tvennt, annars vegar eldri hluta sem nefndur er "Koloniehavn" og eru þar aðallega byggingar frá 18. og 19. öld og hins vegar byggingar sem eru aðallega frá seinni hluta 20. aldar, meðal annars stór fjölbýlishús.

Aqqusinersuaq, aðalgatan í Nuuk

Bærinn Nuuk hefur vaxið hratt. Um 1950 var íbúafjöldi einungis um 1.000 manns og hefur hinn hraði vöxtur leitt til margvíslegra félagslegra vandamála.

Atvinnulífið í Nuuk einkennist af fiskvinnslu, stjórnsýslu og ferðaþjónustu. Höfnin er oftast opin allt árið og við bæinn er einnig alþjóðlegur flugvöllur.

Það var trúboðinn Hans Egede sem stofnaði Godthåb sem trúboðsstöð og verslunaraðsetur árið 1728 í umboði Danakonungs. Bærinn stendur þar sem á tímum norrænna manna á Grænlandi var nefnt Vestribyggð og er enn mikið af leifum þess tíma að finna í grenndinni.

Buksefjord-virkjunin veitir Nuuk rafmagn með raflínu sem spannar 5,4 kílómetra.

Samgöngur

Nuuk-flugvöllur er rétt norðaustan við bæinn. Hann var byggður árið 1979. Árið 2024 var hann lengdur svo að millilandaflug stærri véla væri kostur. Flug til New York varð þá mögulegt.

Íþróttir

Meðal íþróttaliða eru Nuuk IL, B-67 og GSS Nuuk. Nuuk-völlurinn er notaður fyrir knattspyrnu og er Godthåbhallen fyrir handbolta.

Tenglar

• Drepið niður fæti í nágrannabænum Nuuk; grein í Morgunblaðinu 1986

• Opinber vefur Nuuk Geymt 28 ágúst 2005 í Wayback Machine