Dritbjalla

Dritbjalla
	; Dritbjalla
Vísindaleg flokkun
Ríki:	Dýraríkið (Animalia);
Fylking:	Liðdýr (Arthropoda);
Flokkur:	Skordýr (Insecta);
Ættbálkur:	Bjalla (Coleoptera);
Ætt:	Mjölbjölluætt (Tenebrionidae);
Ættkvísl:	Alphitobius;
Tegund:	Dritbjalla (A. diaperinus);
Tvínefni
	Alphitobius diaperinus;

Dritbjalla (fræðiheiti Alphitobius diaperinus) er bjalla af mjölbjölluætt. Dritbjalla er gljáandi svört á lit og svipuð hveitibjöllu að sköpulagi. Hún er um 7 mm löng. Dritbjalla er upprunnin í Austur-Afríku en hefur breiðst út frá því um miðja 20. öld. Í heimkynnum í Afríku lifir dritbjalla á driti og skít úr fuglshreiðrum og leðurblökuhellum. Bjallan hefur dreifst víða með kornflutningum og borist þar til alifuglabúa. Hvert kvendýr verpir um 2000 eggjum og við 32°C tekur þroskaferlið frá eggi til bjöllu um einn mánuð en ef hitastiðg fer undir 15°C þá stöðvast vöxtur og þroski og öll þroskastig drepast ef hiti er undir frostmarki í nokkra daga.

Fullvaxnar lirfur grafa sig inn í tiltækt efni í umhverfi sínu svo sem dritskán eða glufur og púpa sig þar. Dritbjalla er vandamál í alifuglarækt því lirfan geymir í sér og ber með sér sýkla eins og Escherichia coli, Campylobacter og Salmonella. Sýklarnir berast í bjöllurnar þegar þær éta skítinn og þær valda auk þess skaða á einangrun í veggjum. Bjöllur geta borist með skít frá hænsnabúum og ef hann er borinn á tún þá geta þæar dreifst þaðan því þær fljúga um. Dritbjalla hefur fundist á tveimur stöðum á Íslandi, í alifuglabúum.

Heimild breyta

Dritbjalla (Vefur Náttúrufræðistofnunar Íslands) Geymt 9 október 2020 í Wayback Machine