Akurey (Kollafirði)
Akurey er lítil eyja í Kollafirði, rétt utan við Örfirisey í Reykjavík. Ekki er vitað til þess að nokkurn tíma hafi verið búið í eyjunni, en hugsanlega hefur einhvern tíma verið manngengt út í hana. Sundið milli Akureyjar og Örfiriseyjar, Hólmasund, er aðeins 0,8 metra á dýpt við háfjöru og því hættulegt að sigla um það. Elstu heimildir um eyjuna eru frá 1379 þegar hún tilheyrði Víkurkirkju. Þar var reist fyrsta siglingamerki í Reykjavík árið 1854. Borgin keypti eyjuna árið 1969 og hefur leigt út nýtingu hlunninda í henni eins og dúntekju og lundaveiði, en þar er töluvert æðarvarp, kríuvarp og stór lundabyggð sem er nýtt og haldið við.
Líklegt er að kornrækt hafi verið stunduð í eynni en í Oddgeirsmáldaga frá árinu 1379 er tekið fram að Jónskirkja í Vík eigi sælding (eitt sáld, þ.e. um 100 kg útsæðiskorns) í Akurey.
Borgarstjórnarflokkur Sjálfstæðisflokksins lagði til árið 2005 að Akurey og Engey verði tengdar við land með landfyllingu og skipulögð byggð á þeim báðum.
Akurey er 6,6 hektarar. Hún er láglend og grösug og ýmsar tegundir sjófugla verpa þar svo sem lundi, sílamáfur, æðarfugl og teista. Lundi er langalgengasta fuglategund í Akurey og telur um 15.000 pör. Akurey var friðuð í maí 2019 og var það fyrsta friðland innan borgarmarka Reykjavíkur.