6. öldin f.Kr.
6. öldin fyrir Krists burð eða 6. öldin fyrir okkar tímatal er tímabilið frá byrjun ársins 600 f.Kr. til enda ársins 501 f.Kr.
6. öldin er hluti fornaldar þar sem Öxulöld nær hátindi sínum. Á þessari öld koma fram fimm hugmyndastraumar frá fimm hugsuðum í ólíkum heimshlutum; Gautama Búdda og Mahavira á Indlandi (búddismi og jainismi), Sóróaster í Persíu (sóróismi), Pýþagóras í Grikklandi og Konfúsíus í Kína (konfúsíusismi). Upphaf grískrar fornaldarheimspeki er rakið til þessarar aldar.
Á fyrri hluta aldarinnar var Annað Babýlóníuveldið ríkjandi í vesturhluta Asíu eftir að hafa brotist undan yfirráðum Assýríu. Konungsríkið Júda í Júdeu leið undir lok þegar Nebúkadnesar 2. lagði Jerúsalem undir sig og flutti íbúana burt. Eftir miðja öldina tók Persaveldi undir stjórn Kýrosar mikla við. Persaveldi varð stærsta heimsveldi sögunnar til þess tíma.
Í Kína stóð Vor- og hausttímabilið þegar landið skiptist milli nokkurra ríkja. Í Mið-Ameríku stóð menning Olmeka á þessum tíma.