Margrét Frímannsdóttir

Margrét Frímannsdóttir (f. 29. maí 1954 í Reykjavík) er íslenskur fyrrum stjórnmálamaður. Margrét sat á þingi frá 1987-2007, fyrst sem þingmaður Alþýðubandalagsins og síðar Samfylkingarinnar. Hún var formaður Alþýðubandalagsins frá 1995-1999 og talsmaður Samfylkingarinnar í alþingiskosningunum árið 1999 og varaformaður flokksins frá 2000-2003.

Nám og störf

Margrét lauk gagnfræða- og landsprófi frá Gagnfræðaskóla Selfoss og stundaði um tíma nám við öldungadeild Fjölbrautaskóla Suðurlands. Hún starfaði í Hraðfrystihúsi Stokkseyrar, við verslunarstörf og sem leiðbeinandi við Grunnskóla Stokkseyrar. Margrét var oddviti Stokkseyrarhrepps frá 1982-1990. Hún var kosin á Alþingi fyrir Alþýðubandalagið í Suðurlandskjördæmi árið 1987 og sat á þingi fyrir flokkinn allar götur til ársins 1999 er hún var kosin á þing fyrir Samfylkinguna. Margrét gegndi þingmennsku til ársins 2007. Í upphafi árs 2008 varð hún forstöðumaður fangelsisins að Litla-Hrauni og gengdi því starfi til ársins 2015. Hún hefur unnið við garðyrkju síðustu ár.

Annað

Ævisaga Margrétar, Stelpan frá Stokkseyri kom út árið 2006 en Þórunn Hrefna Sigurjónsdóttir skrásetti. Margrét hlaut riddarakross hinnar íslensku fálkaorðu á nýársdag árið 2019.