Hljóðfæri

(Endurbeint frá Hljómfæri)

Hljóðfæri er tæki sem notað er til að spila tónlist. Í raun og veru má telja allt sem framkallað getur stýrt hljóð til hljóðfæra. Venjan er hinsvegar sú að miða við það sem er sérstaklega gert til þess. Hljóðfærum er skipt upp í nokkra flokka eftir því hvernig þau búa til hljóð:

  • Ásláttarhljóðfæri framkalla hljóð þegar þau eru slegin. Hljóðið sem myndast getur bæði haft skýra tónhæð eður ei, þetta fer þó eftir hljóðfærinu.
  • Blásturshljóðfæri mynda hljóðið með titringi loftsúlu innan í þeim. Tíðni bylgjunnar sem kemur fer eftir lengd loftsúlunnar og lögun hljóðfærisins, á meðan hljómblær hljóðsins fer eftir byggingu hljóðfærisins og hvernig hljóðið er framkallað. Þessum flokki hljóðfæra er venjulega skipt í Tréblásturshljóðfæri og Málmblásturshljóðfæri.
  • Rödd , þ.e.a.s. mannsröddin er oft flokkuð sem hljóðfæri út af fyrir sig. Söngvari framkallar hljóð þegar loftflæði frá lungum kemur af stað titringi í raddböndum.
  • Strengjahljóðfæri framkalla hljóð þegar strekktur strengur er plokkaður, strokinn, sleginn, og svo framvegis. Tíðni bylgjunnar fer eftir lengd þess hluta strengsins sem titrar, massa hans, spennu og á hvaða punkti strengurinn er örvaður. Hljómblærinn fer síðan eftir hönnun þess rýmis sem hljóðið hermist í.
  • Rafhljóðfæri búa til hljóðið með því að beita raftækni. Oft líkja þau eftir öðrum hljóðfærum í hönnun, einkum hljómborð.
  • Hljómborðshljóðfæri eru öll þau hljóðfæri sem nota hljómborð til spilunar. Hver lykill gefur eitt eða fleiri hljóð frá sér, mörg hljóðfæri bjóða upp á möguleika til þess að hafa áhrif á hljóðin, t.d. píanó hefur pedala til þess. Hljóðfærin geta framkallað hljóðin með blæstri (orgel), titringi strengja sem geta þá verið slegnir (píanó) eða plokkaðir (semball).
  Þessi tónlistargrein er stubbur. Þú getur hjálpað til með því að bæta við greinina.