Guðni Baldursson

Guðni Baldursson (4. mars 1950 – 7. júlí 2017) var fyrsti formaður Samtakanna ’78. Hann gengdi því hlutverki á árunum 1978-1986.

Guðni átti stóran þátt í lagalegum betrumbótum á réttindum hinsegin fólks á Íslandi.

Ævi

Guðni fæddist í Reykjavík þann 4. mars árið 1950. Foreldrar hans voru Baldur Aspar prentari og Þóra Guðnadóttir móttökuritari. Guðni lauk stúdentsprófi frá Menntaskólanum við Hamrahlíð árið 1970 og námi í viðskiptafræði frá Háskóla Íslands árið 1976. Hann starfaði fyrir Hagstofuna og síðar Þjóðskrá Íslands í hátt í 40 ár.

Guðni var á meðal stofnfélaga Samtakanna '78 og var fyrsti formaður samtakanna. Hann var einnig stofnfélagi í Alnæmissamtökunum (síðar HIV Ísland) og sat í stjórn þess félags í rúm 30 ár. Hann var einnig fyrsti opinberlega samkynhneigði Íslendingurinn til þess að bjóða sig fram í Alþingiskosningum en hann tók sæti á lista Bandalags jafnaðarmanna vegna alþingiskosninganna árið 1983. Guðni lagði áherslu á að framboð hans væri ekki vegna persónulegs metnaðar heldur hluti af baráttu samkynhneigðra fyrir sýnileika og jafnrétti. Til að undirstrika það var ósk Guðna sú að hann yrði ekki titlaður viðskiptafræðingur á framboðslistanum heldur formaður Samtakanna '78.

Lífsförunautur hans, Helgi Viðar Magnússon dó árið 2003 en þeir hófu sambúð árið 1979.