Fjölbrautaskólinn í Garðabæ

**Fjölbrautaskólinn í Garðabæ**
Stofnaður	1984
Skólastjóri	Kristinn Þorsteinsson
Nemendafélag	NFFG (Nemendafélag Fjölbrautaskólans í Garðabæ)
Staðsetning	Skólabraut 6, 210 Garðabæ
Gælunöfn	FG
Heimasíða	www.fg.is

Fjölbrautaskólinn í Garðabæ (FG) (stofnaður 1. ágúst 1984) er framhaldsskóli staðsettur við Skólabraut 1 í Garðabæ. Upphaflega var skólinn kallaður Fjölbrautir Garðaskóla en síðar þótti þörf fyrir að stofna fjölbrautaskóla. Skólinn var upphaflega staðsettur í nokkrum iðnaðarhúsum að Lyngási í Garðabæ en reist var nýbygging undir skólann og var flutt þangað inn í september 1997. Nokkrir landsþekktir einstaklingar hafa stundað nám við skólann, svo sem Sigmar Guðmundsson, Guðrún Jana, Pétur Jóhann Sigfússon og Jóhannes Damian Patreksson (JóiPé).

Upphaf skólans

Fjölbrautaskólinn í Garðabæ var formlega stofnaður 1. ágúst 1984 með sérstökum samningi er gerður var á milli menntamálaráðuneytisins og bæjarstjórnar Garðabæjar. Í samningi þessum er kveðið á um fyrirkomulag skólahalds og hljóðar 1. grein svo: „Í Garðabæ skal starfa skóli fyrir nemendur á framhaldsskólastigi er sjái um allt nám þar að loknum grunnskóla. Skólinn skal taka við framhaldsnámi sem verið hefur við Garðaskóla“. Árið 1978 voru stofnaðar framhaldsdeildir við Garðaskóla og nefndar Fjölbrautir Garðaskóla. Nemendur gátu lokið þar tveggja ára námi en urðu síðan að leita til annarra skóla. Framhaldsdeildunum óx fiskur um hrygg og vorið 1982 útskrifuðust fyrstu stúdentarnir frá Fjölbrautum Garðaskóla með hjálp Flensborgarskólans.

Sérstök ritnefnd vinnur nú að því að rita sögu skólans til útgáfu.

Húsnæði

Skólinn er nú til húsa í nýju húsnæði við Skólabraut. Hinn 19. nóvember 1993 var undirritaður samningur milli ríkisins annars vegar og sveitarstjórna Garðabæjar og Bessastaðahrepps hins vegar um byggingu á nýju skólahúsi við Bæjarbraut í Garðabæ. Flutt var inn í nýja byggingu í september 1997.

Námsbrautir

Fjölbrautaskólinn í Garðabæ útskrifar nemendur af 9 námsbrautum:

Alþjóðabraut
Félagsvísindabraut
Hönnunar- og markaðsbraut
Íþróttabraut
Listnámsbraut
Menntabraut
Náttúrufræðibraut
Sérnámsbraut
Viðskiptabraut

Félagslíf

Nemendafélag var stofnað við skólann árið 1986. NFFG skipuleggur alla helstu atburði og skemmtanir á vegum skólans, auk þess sér það um hagsmunamál nemenda. Nemendafélagið stendur að ýmiss konar félagsstarfi til dæmis: böllum, árshátíð, rokkfestival, tónleikum, íþróttamóti, ræðukeppnum, blaðaútgáfu og mörgu fleira.

Innan NFFG starfa margar nefndir og félög, þar má nefna atburðarnefnd, skemmtinefnd, íþróttanefnd, vefnefnd & útgáfunefnd. Auk þeirra eru þrjú sjálfstætt starfandi félög sem starfa þó náið með NFFG: Leikfélagið Verðandi, Málfundarfélagið Rökrétta & Nördaklúbburinn Megatron.

Þá sigraði skólinn í fyrsta skipti í sögunni Gettu Betur árið 2018. Lið skólans skipaði Jóel Ísak Jóelssyni, Gunnlaugi Hans Stephensen og Guðrúnu Kristínu Kristinsdóttur. Þjálfarar voru Starkaður Pétursson, Helga Margrét Höskuldsdóttir og Tómas Geir Howser Harðarson, allir fyrrum nemendur við skólann. Árangur liðsins má rekja til Sigurlaugs Ingólfssonar, sagnfræðing og safnvörð Árbæjarsafns. Auk þess hefur liðið tapað í úrslitum 2015 og 2022 undir leiðsögn Sigurlaugs.