Alanar
Alanar voru hópur sarmatískra ættbálka sem töluðu austuríranskt mál, dregið af skýþósarmatísku og er forveri nútímaossetísku. Alanar koma fyrst fyrir í rómverskum heimildum frá 1. öld f.Kr. og eru þá sagðir ráðast bæði á Parþa og rómversku skattlöndin í Kákasus. Alönum er lýst sem hirðingjum sem berjast á hestbaki. Um 370 réðust húnar á lönd alana og hluti þeirra hraktist þá vestur á bóginn þar sem þeir gengu í lið með svefum og vandölum í herförum þeirra í Gallíu, Íberíu og Norður-Afríku. Hluti þeirra varð eftir og urðu forfeður osseta nútímans.
