Stjörnustríð: Fyrsti hluti – Ógnvaldurinn
Stjörnustríð: Fyrsti hluti – Ógnvaldurinn er bandarísk geimmynd eftir George Lucas frá 1999. Myndin var framleidd af Lucasfilm og dreift af 20th Century Fox. Í aðalhlutverkum voru Liam Neeson, Ewan McGregor, Natalie Portman, Jake Lloyd, Ian McDiarmid, Anthony Daniels, Kenny Baker, Ahmed Best, Pernilla August, Brian Blessed, Ray Park og Frank Oz. Þetta var fyrsta myndin í fyrirrennaraþríleik Stjörnustríðs, þar sem fyrstu myndirnar þrjár frá 1977, 1980 og 1983, voru settar upp sem númer 4, 5 og 6.
| Stjörnustríð: Fyrsti hluti – Ógnvaldurinn | |
|---|---|
| Star Wars Episode I – The Phantom Menace | |
 | |
| Leikstjóri | George Lucas |
| Handritshöfundur | George Lucas |
| Framleiðandi | Rick McCallum |
| Leikarar | Liam Neeson Ewan McGregor Natalie Portman Jake Lloyd Ian McDiarmid Anthony Daniels Kenny Baker Pernilla August Frank Oz |
| Kvikmyndagerð | David Tattersall |
| Klipping | Paul Martin Smith Ben Burtt |
| Tónlist | John Williams |
| Fyrirtæki | Lucasfilm Ltd |
| Dreifiaðili | 20th Century Fox |
| Lengd | 133 mínútur |
| Land | Bandaríkin |
| Tungumál | Enska |
| Ráðstöfunarfé | 115 milljónir USD |
| Heildartekjur | 1 milljarða USD |
Myndin gerist 32 árum fyrir fyrstu Stjörnustríðsmyndina og segir frá Jedi-riddaranum Qui-Gon Jinn (Neeson) og lærisveini hans Obi-Wan Kenobi (McGregor) sem eiga að fylgja Amidölu drottningu plánetunnar Naboo (Portman) til höfuðstöðva geimlýðveldisins á Coruscant. Á leiðinni lenda þau á plánetunni Tatooine þar sem þau rekast á ungan dreng, Anakin Skywalker (Jake Lloyd), sem Qui-Gon finnur að hefur máttinn í sér í miklum mæli. Hann slæst því í för með þeim til Coruscant og skilur móður sína eftir.
Þetta var fyrsta myndin sem Lucas leikstýrði eftir 22 ára hlé og fyrsta Stjörnustríðsmyndin í 16 ár. Lucas nýtti sér framfarir í tölvuvinnslu og mikið af sögusviðinu og sumar persónur myndarinnar voru alfarið unnin í tölvu. Myndin var tekin í Leavesden Studios í Hertfordshire á Englandi og í Túnis. Caserta-höll á Ítalíu var notuð sem tökustaður fyrir höll Amidölu á Naboo.
