Skjaldarmerki Úkraínu
Skjaldarmerki Úkraínu (úkraínska: Державний Герб України) er opinbera skjaldarmerki Úkraínu. Það er þekkt í daglegu úkraínsku tali sem Tryzub (úkraínska: Тризуб, „þríforkur“). Á skjaldarmerkinu eru þeir sömu litir sem finnast á úkraínska fánanum, blár skjöldur með gulum þríforki. Skjaldarmerkið er á gunnfána forseta Úkraínu.
Þríforkurinn á skjaldarmerkinu rekur uppruna sinn til innsigla sem notuð voru af Valdimari gamla, fursta í Garðaríki á 10. öld. Hugsanlegt er að Valdimar hafi erft merkið frá föður sínum. Hann lét merkið ganga til sona sinna og þríforkurinn varð því að frægu kennimarki Rúriksættarinnar, sem réð yfir furstadæmunum í Garðaríki sem síðar urðu að Úkraínu, Rússlandi og Hvíta-Rússlandi.
Skjaldarmerkið var tekið í notkun þann 19. febrúar 1992.
