Sæunnarsund

Sæunnarsund er þrekvirki sem kýrin Harpa þreytti árið 1987. Forsaga sundsins var að bóndi í Neðri-Breiðadal í Önundarfirði þurfi að fækka gripum á bænum vegna nýrra laga um gripakvóta. Varð Harpa fyrir valinu og var hún flutt til Flateyrar þann 13. október þar sem átti að slátra henni. Í sláturhúsinu sleit kýrin sig lausa og stökk í sjóinn. Synti hún yfir Önundarfjörð þveran, um tveggja kílómetra leið, og náði landi hinu megin fjarðarins um klukkutíma síðar. Bændurnir á Kirkjubóli í Valþjófsdal voru látin vita og fylgdust þau með sundi kýrinnar yfir fjörðinn. Þegar hún skilaði sér í land ákváðu þau að launa henni afrekið og taka hana að sér. Eftir sundið var kýrin nefnd Sæunn. Sæunn lifði í sex ár til viðbótar en var felld árið 1993. Hún var þá heygð þar sem hún kom í land eftir sundið, og hefur sá staður síðan verið kallaður Sæunnarhaugur.

Síðan 2018 hefur árlega verið haldið upp á afrekið með sundi sömu leið og Sæunn fór árið 1987.