Internet Archive
Internet Archive er stafrænt gagnasafn sem geymir ýmis konar stafræn gögn, þar á meðal vefsíður, hugbúnað, hljóðskrár, kvikmyndir og milljónir stafrænna endurgerða af bókum. Internet Archive er sjálfseignarstofnun staðsett í Richmond í San Francisco, Kaliforníu. Stofnunin berst líka fyrir frjálsu og opnu Interneti. Í janúar 2023 voru yfir 36 milljón bækur og 780 milljarðar vefsíðna varðveitt hjá stofnuninni. Aðgangur að vefsíðum sem stofnunin varðveitir er í gegnum hugbúnaðinn Wayback Machine sem stofnunin hefur þróað.
Internet Archive var stofnað árið 1996 af bandaríska tölvunarfræðingnum Brewster Kahle sem þá vann fyrir leitarvélina Alexa Internet. Sama ár hóf Internet Archive að safna og varðveita vefsíður í miklu magni. Safnið varð aðgengilegt almenningi árið 2001. Árið 2003 stóð Internet Archive að þróun sérhæfðrar vefköngulóar (skriðils) til að safna vefsíðum í samstarfi við norrænu landsbókasöfnin, sem fékk heitið Heritrix. Sama ár voru samtökin International Internet Preservation Consortium stofnuð af 12 landsbókasöfnum í kringum varðveislu á vefsíðum.
Landsbókasafn Íslands hóf að safna vefsíðum með Heritrix-hugbúnaðinum árið 2004 fyrir Vefsafnið. Internet Archive gaf síðan safninu afrit af þeim íslensku vefsíðum sem stofnunin hafði safnað frá 1996.
