Hengibrú

Hengibrú er ein gerð brúar, þar sem brúargólfið eða brautin, hangir í burðarköplum sem festir eru í akkeri við báða enda. Hengibrýr í frumstæðri mynd eru eflaust nokkur þúsund ára gamlar, og eru dæmi um slíkar brýr í Kína á 2. öld fyrir Krist.

Iðubrú, hengibrú yfir Hvítá í Árnessýslu.

Golden Gate-brúin, yfir „Gullna hliðið“, sem tengir San Francisco-flóa við Kyrrahafið.

Á 19. öld kom fram sú hugmynd að lyfta burðarköplunum með háum turnum, eða stöplum, og má segja að þá hafi komið fram hengibrýr í nútímamerkingu. Með tækniframförum á síðustu áratugum hefur tekist að byggja lengri hengibrýr en áður var mögulegt. Er þar bæði verið að uppfylla ákveðnar þarfir í samgöngum, en einnig að fullnægja metnaði verkfræðinga og þjóða, með því að fara að ystu mörkum þess sem er tæknilega mögulegt. Auk þess eru hengibrýr oft glæsileg mannvirki.

Lengstu hengibrýr heims

Hengibrýr eru oft flokkaðar eftir því hvað þær spanna langt haf milli meginstöpla. Lengstu hengibrýr í heimi eru nú:

1. 1915 Çanakkale-brúin: 2.023 metrar, vígð árið 2022
2. Akashi-Kaikyo-brúin: 1.991 metrar, vígð árið 1998
3. Yangsigang-brúin: 1.700 metrar, vígð árið 2019
4. Xihoumen-brúin: 1.650 metrar, vígð árið 2007
5. Stórabeltisbrúin: 1.624 metrar, vígð árið 1998
6. Osman Gazi-brúin: 1.550 metrar, vígð árið 2016
7. Yi Sun-sin-brúin: 1.545 metrar, vígð árið 2012
8. Runyang-brúin: 1.490 metrar, vígð árið 2005
9. Fjórða Nanjing Yangtze-brúin: 1.490 metrar, vígð árið 2012
10. Humber-brúin: 1.410 metrar, vígð árið 1981