Gull-Ívan Grjótharði

(Endurbeint frá Gull-Ívar Grjótharði)

Gull-Ívan Grjótharði (enska: Flintheart Glomgold) er persóna í veröld Andrésar andar. Hann birtist fyrst í sögunni The Second Richest Duck eftir Carl Barks árið 1956. Hann er næst ríkasta önd í heiminum, á eftir Jóakim Aðalönd og svarinn óvinur Jóakims. Hann býr í Suður-Afríku. Í sumum sögum hefur Gull-Ívan verið nefndur Glúmur.

Samkvæmt sögunni The Terror of the Trasvaal eftir Don Rosa hittust Gull-Ívan og Jóakim fyrst árið 1887 í Afríku áður en þeir urðu ríkir (reyndar virtist fyrsta saga Gull-Ívans vera fyrsta sinn sem þeir hittust, en Jóakim kemst aldrei að því hvað Gull-Ívan heitir í Terror of the Transvaal, svo að hann þekkir hann sennilegast ekki aftur í The Second Richest Duck).

Þó að bæði Jóakim og Gull-Ívan hafi fæðst í fátækt, er munurinn á þeim sá að Gull-Ívan varð ekki ríkur heiðarlega.

Gull-Ívan er líka í sjónvarpsþáttinum Sögur úr Andabæ, en þar er hann býsna ólíkur sjálfur sér og nafnið hans var misþýtt sem "Glúmur".

Ítalskir og brasilískir höfundar nota venjulega Jóa Rokkafelli í staðinn fyrir Gull-Ívan. Þetta er ef til vill einfaldlega vegna þess að Jói býr í Andabæ og er því auðveldara að blanda honum í sögurnar um Jóakim.