Guðrún Hallgrímsdóttir
Guðrún Hallgrímsdóttir (fædd 5. nóvember 1941) lauk prófi í matvælaverkfræði frá Humboldt-Universität í Berlín árið 1968. Hún hóf starfsferil sinn sem forstöðumaður rannsóknarstofu Búvörudeildar SÍS. Á árunum 1977-79 var Guðrún iðnþróunarfulltrúi hjá Iðnþróunarstofnun Sameinuðu þjóðanna í Vínarborg. Eftir að hún kom heim aftur varð hún deildarstjóri í iðnaðarráðuneytinu og vann þar til 1985. Næstu fimm árin var Guðrún forstöðumaður hjá Ríkismati sjávarafurða. Hún varð síðan sérfræðingur í sjávarútvegsráðuneytinu, verkefnisstjóri um gæðastjórnun í matvælaiðnaði og verkefnisstjóri á fræðsludeild Iðntæknistofnunar á árunum 1996–2004 þegar hún lét af störfum.
Guðrún hefur sinnt fræðslustörfum og samið námsefni á sviði matvælaframleiðslu og gæðastjórnunar. Einnig hefur hún ritað og haldið fyrirlestra um íslenska matarhefð, lífræna ræktun, sjálfbærar fiskveiðar og margt fleira.
Guðrún hefur gegnt margvíslegum stjórnunar- og trúnaðarstörfum á vegum hins opinbera og einkafyrirtækja. Hún hefur tekið virkan þátt í stjórnmálum og var ein af stofnendum Rauðsokkahreyfingarinnar. Hún var varaþingmaður og tók sæti á Alþingi um tíma. Kvenfrelsisbarátta, friðar- og umhverfismál hafa alla tíð verið henni hugleikin.
Heimild
breyta- Olga Guðrún Árnadóttir (ritstj.) (2011). Á rauðum sokkum, baráttukonur segja frá. Háskólaútgáfan og RIKK. ISBN 9789979549260.